पदक जित्ने तयारी गर्नुस्, बजेटको समस्या हुँदैनः मुख्यमन्त्री शाही

कर्णाली । कर्णाली प्रदेशका मुख्यमन्त्री मङ्गलबहादुर शाहीले उत्कृष्ट खेलाडी छनोट गरी पदक जित्ने तयारीमा जुट्न प्रदेश खेलकुद विकास परिषद्लाई आग्रह गरेका छन् । त्यसका लागि बजेटको अभाव हुन नदिने उनले प्रतिबद्धता जनाएका छन् ।

Watch On

दशौँ राष्ट्रिय खेलकुद प्रतियोगिताको तयारीका सम्बन्धमा बसोबास व्यवस्थापन उपसमितिले आज सुर्खेतको वीरेन्द्रनगरमा आयोजना गरेको छलफलमा मुख्यमन्त्री शाहीले कर्णालीका लागि प्रतियोगिता चुनौती र स्वर्णिम अवसर दुवै भएको बताए । चुनौतीको सामना गर्दै अवसरको उपयोग गर्न सबै एकजुट भएर अघि बढ्नुपर्ने उनको भनाइ थियो ।

“तपाईंहरू निष्पक्ष भएर राम्रा खेलाडी छनोट गर्नुस् । राम्रा प्रशिक्षक ल्याउनुस् र पदक जित्ने तयारीमा लाग्नुस्, बजेटको कुनै समस्या हुँदैन । मागभन्दा बढी बजेट दिन प्रदेश सरकार तयार छ,” उनले भने ।

दशौँ राष्ट्रिय खेलकुदको व्यवस्थापन प्रदेश सरकार, परिषद् वा सरकारी निकायको एकल प्रयासबाट मात्र सम्भव नहुने भन्दै उनले सबै सरोकारवालाको सहयोग र सहकार्य आवश्यक रहेको बताए ।

प्रतियोगिताको आयोजक सङ्घीय सरकार भए पनि आयोजना कर्णाली प्रदेशमा हुने भएकाले कुनै कमजोरी हुन नदिन सबै निकायबीच समन्वय हुनुपर्नेमा उनले जोड दिए । प्रतियोगिता पुनः स्थगित हुन्छ कि भनेर आशङ्का नगर्न पनि उनले सबैलाई आग्रह गरे ।

छलफलमा प्रदेशका सामाजिक विकासमन्त्री जीतबहादुर मल्लले कर्णाली प्रदेशले जिम्मेवारी पाएका चारवटै उपसमितिले हालसम्म सन्तोषजनक काम गरेको बताए । बाँकी उपसमितिले गरिरहेका कामप्रति पनि प्रदेश सरकारको चासो रहेको उल्लेख गर्दै उनले प्रतियोगिता व्यवस्थापनको जिम्मेवारी पूरा गर्न कुनै कसर बाँकी नराख्न आग्रह गरे ।

छलफलमा प्रदेश सरकारका प्रमुख सचिव राधिका अर्याल, वीरेन्द्रनगर नगरपालिकाका प्रमुख मोहनमाया ढकाल, प्रदेश प्रहरी प्रमुख जयराज सापकोटा, होटल व्यवसायी महासङ्घका पदमबहादुर शाही र तर्कबहादुर शाही तथा नेपाल पत्रकार महासङ्घका अध्यक्ष मधुवन बिसीलगायतले सुझाव दिएका थिए ।

दशौँ राष्ट्रिय खेलकुद प्रतियोगिता आगामी मङ्सिर १६ देखि २७ गतेसम्म कर्णाली प्रदेशमा हुँदैछ ।