समाज

बंगालको खाडीमा ‘मुरासु’ चक्रवात, नेपालमा के प्रभाव पर्ला?

सिधाकुरा

आइतबार, कात्तिक १५, २०८३

बंगालको खाडीमा ‘मुरासु’ चक्रवात, नेपालमा के प्रभाव पर्ला?

काठमाडौँ । दक्षिणपश्चिम बंगालको खाडीमा विकसित चक्रवात ‘मुरासु’ले शक्तिशाली चक्रवाती आँधीको रूप लिने र भारतको आन्ध्र प्रदेशको दक्षिणी तटीय क्षेत्रमा प्रवेश गर्ने सम्भावना रहेको छ ।

Watch On

नेपाल मौसम विज्ञान विभागको मौसम पूर्वानुमान महाशाखाका अनुसार आइतबार बिहान ११ः४५ बजे दक्षिणपश्चिम बंगालको खाडी तथा आसपासको मध्यपश्चिम बंगालको खाडीमा ‘मुरासु’ चक्रवात बनेको हो ।

महाशाखाले जारी गरेको विशेष मौसम बुलेटिनअनुसार उक्त प्रणाली सोमबार (कात्तिक १६ गते) मध्यपश्चिम बंगालको खाडीमा शक्तिशाली चक्रवाती आँधीमा परिणत हुने सम्भावना छ । त्यसपछि पश्चिम–उत्तरपश्चिम दिशातर्फ अघि बढ्दै मंगलबार (कात्तिक १७ गते) भारतको आन्ध्र प्रदेशको दक्षिणी तटीय क्षेत्रमा नेल्लोर र नरसापुरबीचबाट जमिनमा प्रवेश गर्ने पूर्वानुमान गरिएको छ ।

हालसम्मको मौसम विश्लेषणअनुसार उक्त चक्रवातका कारण नेपालको मौसममा उल्लेखनीय प्रभाव पर्ने सम्भावना नरहेको महाशाखाले जनाएको छ ।

महाशाखाले चक्रवातको निरन्तर अनुगमन गरिरहेको र आवश्यकताअनुसार थप सूचना अद्यावधिक गर्ने जनाएको छ । मौसमसम्बन्धी आधिकारिक तथा अद्यावधिक जानकारीका लागि विभागबाट जारी हुने सूचना नियमित रूपमा हेर्न पनि आग्रह गरेको छ ।

प्रकाशित मिति: आइतबार, कात्तिक १५, २०८३

प्रतिक्रिया दिनुहोस्