चिनियाँ कम्युनिस्ट पार्टीले आफ्ना अधिकारीको सम्पत्ति र अनलाइन गतिविधिमाथि निगरानी बढाउने

एजेन्सी। चिनियाँ कम्युनिस्ट पार्टी (सीसीपी) ले आफ्ना अधिकारीहरूको सम्पत्ति, पारिवारिक व्यावसायिक गतिविधि र अनलाइन व्यवहारमाथि कडा निगरानी बढाउने भएको छ ।

Watch On

आइतबार सार्वजनिक पार्टी दस्तावेजमा अधिकारीहरूको सम्पत्ति तथा अनलाइन गतिविधिमाथि निगरानी बढाउने योजना समेटिएको छ । चीनको सरकारी समाचार संस्था सिन्ह्वाले प्रकाशित गरेको उक्त दस्तावेज बेइजिङमा यसै साता सम्पन्न पार्टीको वार्षिक पूर्ण बैठकपछि सार्वजनिक भएको हो । बैठकले शासन व्यवस्था सुधार र भ्रष्टाचार नियन्त्रणमा जोड दिएको थियो ।

चीनका राष्ट्रपति सी जिनपिङले एक दशकभन्दा बढी समयदेखि भ्रष्टाचारविरुद्ध कडा अभियान सञ्चालन गर्दै आएका छन् । यस क्रममा हजारौँ अधिकारी कारबाहीमा परेका छन् भने केन्द्रीय समितिका दर्जनौँ सदस्य र उच्च सैन्य अधिकारीसमेत पदमुक्त भएका छन् ।

आइतबार सार्वजनिक प्रस्तावमा पार्टी अधिकारीहरूको निगरानी र व्यवस्थापनलाई थप कडा बनाउने उल्लेख छ ।

“उच्च पदस्थ अधिकारीहरूबाट सुरु गर्दै हामी अधिकारीहरूको सर्वाङ्गीण व्यवस्थापन र नियमित निगरानीलाई कडा बनाउनेछौँ । उनीहरूको सम्पूर्ण कार्यकालभरि कडा मापदण्ड लागू गर्नेछौँ”, प्रस्तावमा भनिएको छ ।

त्यस्तै, परिवारको सम्पत्ति र खर्च सामान्य आम्दानीभन्दा अस्वाभाविक रूपमा बढी भएका अधिकारीहरूको अनुसन्धान तथा प्रमाणीकरण गरिने दस्तावेजमा उल्लेख छ । अधिकारीका जीवनसाथी र छोराछोरीका व्यावसायिक गतिविधिमाथि पनि निगरानी बढाइने भएको छ ।

“हामी पार्टी सदस्यहरूको अनलाइन व्यवहारलाई अझ राम्रोसँग नियमन गर्नेछौँ”, प्रस्तावमा भनिएको छ ।

पार्टीले भर्चुअल मुद्रा र ब्लकचेनमार्फत हुने भ्रष्टाचार नियन्त्रणलाई पनि प्राथमिकतामा राखेको छ । बिहीबार सम्पन्न पूर्ण बैठकले ‘पार्टीको पूर्ण र कडा शासनलाई अगाडि बढाउने’ निर्णय गरेको थियो । यसमा पार्टीका कार्यकर्ताबाट हुने भ्रष्टाचार नियन्त्रणका उपायसमेत समेटिएका छन् ।

सिन्ह्वाका अनुसार बैठकपछि थप ३३ जना उच्च पदाधिकारीलाई पार्टीबाट निष्कासन गरिएको छ । निष्कासनमा पर्नेमा पूर्व पोलिटब्युरो सदस्य झाङ यौसिया पनि छन् । उनी कुनै समय चीनका उच्च पदस्थ सैन्य जनरल थिए ।

पार्टीका समर्थकहरूले भ्रष्टाचार नियन्त्रण अभियानले स्वच्छ शासन प्रवर्द्धन गर्ने विश्वास व्यक्त गर्दै आएका छन् । यद्यपि, विश्लेषकहरूले यी कदम सन् २०२७ को पहिलो छ महिनापछि हुने पार्टी कंग्रेसमा राष्ट्रपति सीको नेतृत्व अवधि थप लम्ब्याउने वातावरण तयार पार्ने उद्देश्यसँग पनि जोडिएको हुन सक्ने बताएका छन् ।

आइतबार सार्वजनिक केन्द्रीय समितिको प्रस्तावमा पार्टीभित्रको लोकतन्त्रलाई प्रभावकारी बनाउने विषयसमेत समेटिएको छ । पार्टी सदस्यलाई आफ्ना विचार व्यक्त गर्ने थप अवसर उपलब्ध गराउने र खुलेर बोल्न प्रोत्साहित गर्ने प्रस्तावमा उल्लेख छ ।

“हामीले पार्टीभित्र लोकतन्त्र अभ्यास गर्ने प्रणालीलाई कायम राख्नु र सुधार गर्नुपर्छ, पार्टी सदस्यहरूको प्रमुख स्थानको सम्मान गर्नुपर्छ र उनीहरूका लोकतान्त्रिक अधिकारको रक्षा गर्नुपर्छ”, केन्द्रीय समितिको प्रस्तावमा भनिएको छ ।