राप्ती नदीको दिगो व्यवस्थापनका लागि वैज्ञानिक अध्ययन र गुरुयोजना निर्माण सुरु

तुलसीपुर (दाङ) । पश्चिम राप्ती नदीको बाढी जोखिम न्यूनीकरण तथा दिगो व्यवस्थापनका लागि वैज्ञानिक अध्ययन र गुरुयोजना निर्माणको काम अघि बढाइएको छ ।

Watch On

लमहीस्थित सिँचाइ तथा जलस्रोत व्यवस्थापन आयोजनाले देउखुरी उपत्यका र आसपासका क्षेत्रमा नदी व्यवस्थापनलाई प्रभावकारी बनाउन अध्ययन सुरु गरेको हो ।

पश्चिम राप्ती नदीको जलाधार क्षेत्रमा भू–उपयोगमा आएको परिवर्तन, विश्वव्यापी तापक्रम वृद्धि र जलवायु परिवर्तनका कारण नदीको बहावमा परेको असरलाई ध्यानमा राखेर अध्ययन अघि बढाइएको आयोजनाले जनाएको छ । बाढी जोखिम न्यूनीकरण गर्नुका साथै नदी आसपास निर्माण हुने पूर्वाधारलाई दिगो र जलवायुमैत्री बनाउन अध्ययनले सहयोग पुर्‍याउने अपेक्षा गरिएको छ ।

आयोजनाका सूचना अधिकारी खुमानन्द वलीका अनुसार आर्थिक वर्ष २०८२/८३ मा पश्चिम राप्ती नदीको सतबरिया क्षेत्रसम्मको करिब ४२ किलोमिटर खण्डमा बहाव क्षेत्र निर्धारण तथा अध्ययन सम्पन्न भएको छ ।

अध्ययनले नौमुरे बाँध निर्माणपछि पश्चिम राप्ती नदीमा सुक्खायाममा हुने पानीको अभाव र वर्षायाममा आउने बाढी व्यवस्थापनमा सहयोग पुग्ने वलीले बताए ।

उनका अनुसार नदी नियन्त्रण, पुल तथा अन्य जलप्रवाहसम्बन्धी संरचनाको डिजाइनमा एकरूपता कायम गर्न पनि अध्ययन उपयोगी हुनेछ । यसबाट दिगो र जलवायुमैत्री संरचना निर्माणमा सहयोग पुग्नेछ ।

यसैबीच, नदी नियन्त्रणका लागि हालसम्म निर्माण गरिएका संरचनाको संरक्षण तथा आगामी योजना व्यवस्थित बनाउन आयोजनाले वेबमा आधारित सम्पत्ति व्यवस्थापन प्रणाली तयार पारेको छ ।

उक्त प्रणालीमा निर्माण भइसकेका संरचनाको डिजिटल अभिलेख, तिनबाट समुदायले प्राप्त गरेको लाभ, आवश्यक थप संरचना, अनुमानित लागत र अपेक्षित प्रतिफल समेटिनेछ । यही विवरणका आधारमा नदी व्यवस्थापनको गतिशील गुरुयोजना तयार पारिने आयोजनाले जनाएको छ ।