काभ्रेमा मतदानस्थल र मतदान केन्द्र पुनरावलोकन प्रक्रिया अघि बढाइँदै

काभ्रेपलाञ्चोक । आगामी निर्वाचनलाई लक्षित गर्दै काभ्रेपलाञ्चोकमा मतदानस्थल र मतदान केन्द्र पुनरावलोकन प्रक्रिया अघि बढाइने भएको छ ।

Watch On

जिल्लास्थित मतदानस्थल तथा मतदान केन्द्र निर्धारण तथा सिफारिस समितिले पुनरावलोकनको प्रक्रिया र कार्यतालिका तय गरेको हो । निर्वाचन आयोगले मतदाता नामावली अद्यावधिकलगायत निर्वाचनलक्षित प्रक्रिया अघि बढाइरहेका बेला जिल्लामा पनि मतदानस्थल र केन्द्रको अवस्थाबारे समीक्षा गर्न लागिएको हो ।

समितिले मतदानस्थल तथा मतदान केन्द्र पुनरावलोकन कार्यक्रम, २०८३ अनुसार गत भदौ १५ गतेसम्म सङ्कलन तथा अद्यावधिक गरी असोज ३० गते प्रकाशित मतदाता नामावलीलाई पुनरावलोकनको आधिकारिक आधार बनाउने निर्णय गरेको छ ।

समितिका संयोजक एवं प्रमुख जिल्ला अधिकारी गोपालकुमार अधिकारीका अनुसार मङ्सिर १ गतेभित्र जिल्लामा क्रियाशील राजनीतिक दललाई हाल कायम मतदानस्थलको सूचीसहित पत्राचार गरी पुनरावलोकन र आवश्यक सिफारिसबारे राय–सुझाव मागिनेछ ।

त्यस्तै, मङ्सिर ४ गतेभित्र वडा मतदानस्थल तथा मतदान केन्द्र सिफारिस समितिलाई आवश्यक कार्यविधि, अनुसूची फाराम, मतदानस्थलको सूची र सम्बन्धित वडाको अन्तिम मतदाता नामावलीको पीडीएफ फाइल पठाइनेछ ।

वडाध्यक्षको संयोजकत्वमा रहने समितिले मङ्सिर १५ गतेभित्र तोकिएको मापदण्डका आधारमा मतदानस्थलको अवस्था, भौगोलिक दूरी, सुरक्षा अवस्था र आवश्यकताबारे अध्ययन गरी सर्वसम्मत निर्णय गर्नुपर्नेछ । वडा समितिका निर्णय तथा प्रमाणित अनुसूची फाराम मङ्सिर २५ गतेभित्र निर्वाचन कार्यालयमा पठाउनुपर्ने कार्यतालिका छ ।

मङ्सिर २९ गतेभित्र वडा समितिबाट प्राप्त सिफारिसको एकीकृत विवरण तयार गरी जिल्ला समितिले विस्तृत अध्ययन गर्नेछ । आवश्यकताअनुसार स्थलगत अध्ययनसमेत गरी मतदानस्थल सिफारिससम्बन्धी अन्तिम निर्णय गरिने प्रजिअ अधिकारीले बताए ।

जिल्ला समितिले गरेको अन्तिम निर्णय र आवश्यक अनुसूची फाराम प्रमाणित गरी आगामी पुस ५ गतेभित्र निर्वाचन आयोगमा पठाइनेछ । स्थानीय तह, राजनीतिक दल तथा अन्य सरोकारवालाको सुझाव समेटेर मतदानस्थल र केन्द्रलाई थप व्यवस्थित, सहज तथा मतदातामैत्री बनाउने उद्देश्य रहेको समितिले जनाएको छ ।

गत वर्ष फागुनमा सम्पन्न प्रतिनिधिसभा सदस्य निर्वाचनमा काभ्रेपलाञ्चोकका १८९ मतदानस्थलमध्ये ८८ वटालाई संवेदनशील र तीमध्ये २३ वटालाई अतिसंवेदनशीलका रूपमा वर्गीकरण गरिएको थियो । बाँकी १०१ मतदानस्थल सामान्य अवस्थाका थिए । जिल्लाका दुई प्रतिनिधिसभा निर्वाचन क्षेत्रमा ४०० मतदान केन्द्र कायम गरिएका थिए ।

त्यसबेला दुवै निर्वाचन क्षेत्रमा सशस्त्र प्रहरीको प्रहरी नायब उपरीक्षकको कमान्डमा दुईवटा सुरक्षा बेसक्याम्प स्थापना गरी सुरक्षाकर्मी परिचालन गरिएको थियो । क्षेत्र नं. १ को पनौती नगरपालिका–५ स्थित सुरक्षा मुद्रण केन्द्र परिसर र क्षेत्र नं. २ को धुलिखेलस्थित शैक्षिक तालिम केन्द्रमा बेसक्याम्प स्थापना गरिएको थियो ।

जिल्लामा पछिल्लो अद्यावधिक विवरणअनुसार तीन लाख २४ हजार नौ मतदाता छन् । निर्वाचन आयोगको मतदाता नामावली अद्यावधिक प्रक्रियाअन्तर्गत जिल्लाका दुई हजार ६०२ जनाको नाम मतदाता सूचीबाट हटाइएको जिल्ला निर्वाचन कार्यालय धुलिखेलले जनाएको छ ।

कार्यालयका अनुसार १३ स्थानीय तहमा दोहोरो दर्ता भएका एक हजार १९८, मृत्यु भएका एक हजार ४०२ र नागरिकता परित्याग गरेका दुई जनाको नाम मतदाता नामावलीबाट हटाइएको हो ।