धान बिक्रीको पर्खाइमा किसान

राँझा (बाँके) । खाद्य व्यवस्था तथा व्यापार कम्पनी लिमिटेडलाई धान बिक्री गर्न स्थानीय किसान प्रतीक्षारत रहे पनि हालसम्म खरिद प्रक्रिया सुरु हुन सकेको छैन।

Watch On

लामो समयदेखि कम्पनीलाई धान बिक्री गर्दै आएका नेपालगन्ज–१९ का किसान कल्लुबहादुर वलीले यस वर्ष खरिद प्रक्रिया सुरु नभएको बताए। खेतबाट धान भित्र्याइसकेका किसान बिक्रीका लागि पर्खाइमा छन्।

“घरभरि धान थुप्रिएको छ, राख्ने ठाउँ छैन। खाद्यले अहिलेसम्म खरिद सुरु गरेको छैन”, वलीले भने, “व्यापारीलाई नदिएर खाद्यलाई धान बिक्री गर्न प्रतीक्षा गरिरहेका छौँ।”

कम्पनीले यस वर्ष २० हजार क्विन्टल धान खरिदको कोटा माग गरेकामा १० हजार क्विन्टल मात्र निर्धारण भएको नेपालगन्ज कार्यालयका प्रमुख रामशरण लामिछानेले जानकारी दिए।

गत वर्ष मोटा धान १५ हजार र मध्यम धान पाँच हजार गरी २० हजार क्विन्टल खरिद गर्ने लक्ष्य राखिएको थियो। त्यसअघि आर्थिक वर्ष २०८१/८२ मा ४० हजार क्विन्टल धान खरिद गर्ने लक्ष्य निर्धारण गरिएकामा नेपालगन्ज कार्यालयले ३२ हजार क्विन्टल खरिद गरेको थियो।

कम्पनीले यस वर्ष मोटा धानको मूल्य प्रतिक्विन्टल तीन हजार ६६० रुपैयाँ र मध्यम धानको मूल्य तीन हजार ८६० रुपैयाँ निर्धारण गरेको छ। तर व्यापारीले कम्पनीले तोकेको मूल्यभन्दा ५०० देखि एक हजार ५०० रुपैयाँसम्म कम मूल्यमा धान खरिद गरिरहेको नेपालगन्ज–१९, सुयिगाउँका किसान ध्रुव थापाले बताए।

“यस वर्ष धान राम्रो फलेको छ। खाद्यले खरिद गर्ने समयसम्म भण्डारण गरेर राख्ने ठाउँ छैन”, उनले भने, “चाडपर्वको खर्च जुटाउन किसानले व्यापारीलाई सस्तोमा धान बेच्नुपरेको छ।”

खाद्य व्यवस्था तथा व्यापार कम्पनी लिमिटेडले ढिलो गरी खरिद गर्ने र प्रक्रिया झन्झटिलो हुने भएकाले पनि किसानले तोकिएको मूल्यभन्दा प्रतिक्विन्टल ५०० देखि एक हजार रुपैयाँसम्म कममा व्यापारीलाई धान बिक्री गर्नुपरेको थापाले बताए।