लोककल्याणकारी राज्यका लागि शंखधर साख्वाको परोपकारी भावना सधैँ सान्दर्भिक : कार्यवाहक प्रमुख डंगोल

काठमाडौँ । नेपाल संवतका प्रवर्तक शंखधर साख्वाको परोपकारी भावनालाई आत्मसात् गर्ने हो भने लोककल्याणकारी राज्यको बलियो जग निर्माण हुने काठमाडौँ महानगरपालिकाकी कार्यवाहक प्रमुख सुनिता डंगोलले बताएकी छिन् ।

Watch On

नेपाल संवत् ११४७ को अवसरमा आज आयोजित कार्यक्रममा उनले, साख्वालाई नेपाल संवतका प्रवर्तकका रूपमा मात्र नभई समाजप्रतिको उत्तरदायित्व र परोपकारको प्रेरणाका रूपमा अनुसरण गर्नुपर्ने बताइन् ।

नेपाल संवत प्रारम्भ अवसरमा आयोजना गरिएको समारोहमा सभामुख डि. पी. अर्याल, गृहमन्त्री सुधन गुरुङसहित उच्च पदस्थ पदाधिकारीहरु सहभागी भएका थिए । 

समारोहमा बोल्दै डंगोललले, व्यक्तिगत सम्पत्ति र सुखसुविधा आर्जन गर्नुभन्दा समाजको हित, नागरिकको दुःख निवारण तथा सकारात्मक परिवर्तनका लागि योगदान गर्नु नै व्यक्तिको वास्तविक महानता भएको धारणा राखिन् ।

कार्यवाहक प्रमुख डंगोलले, राज्यको दायित्व कर सङ्कलन र प्रशासन सञ्चालन गर्ने संयन्त्रमा मात्र सीमित हुनु नहुने उल्लेख गर्दै विपन्न, सीमान्तकृत, पछाडि पारिएका तथा दुःखमा परेका नागरिकको हित सुनिश्चित गर्ने दायित्वलाई पहिलो जिम्मेवारीका रुपमा ग्रहण गर्नु पर्ने बताइन् । स्वास्थ्य, शिक्षा, न्याय तथा सामाजिक अधिकार सुनिश्चित गर्न नागरिकमैत्री नीति, कानुन र कार्यक्रम आवश्यक रहेको उनको भनाइ थियो । नागरिकले सहज रूपमा आधारभूत सेवा प्राप्त गर्ने वातावरण निर्माण गर्नमा राज्य संयन्त्रको प्राथमिकता हुनुपर्ने उनले बताइन् ।

काठमाडौँ महानगरपालिकाले नागरिकको सेवाका लागि स्वास्थ्य तथा न्याय क्षेत्रमा विभिन्न कार्यक्रम सञ्चालन गरिरहेको जानकारी दिइन् । 

तिहारसम्म अँध्यारा स्थानमा सडकबत्ती जडान गर्ने लक्ष्यसहित सार्वजनिक खरिद प्रक्रिया अगाडि बढाइएकोमा प्राविधिक कारणले यसपटक प्रक्रिया पूरा हुन नसकेको उनले बताइन् । आगामी दिनमा झिलिमिली सहर अभियानलाई निरन्तरता दिइने उनको भनाइ थियो ।

कार्यवाहक प्रमुख डंगोलले काठमाडौँ महानगरपालिकाले श्री गणेश र श्री भैरवको निवास निर्माणको तयारीसमेत अघि बढाएको जानकारी दिइन् । निवास निर्माणका लागि आगामी मङ्सिर ५ गते पूजाआजासहित शिलान्यास गर्ने तयारी गरिएको उनले बताइन् ।

जीवित देवी कुमारीसँगै जीवित देवता श्री गणेश र श्री भैरवको पनि एकै स्थानमा निवास हुनुपर्ने स्थानीय समुदायको लामो समयदेखिको मागलाई सम्बोधन गर्न महानगरपालिकाले निर्माण प्रक्रिया अघि बढाएको उनले उल्लेख गरिन् ।