दुई मोटरसाइकल ठोक्किँदा एक जनाको मृत्यु, तीन गम्भीर घाइते

बर्दिया। बर्दियाको बाँसगढी नगरपालिका–५ मोतिपुर जंगलस्थित भित्री सडकखण्डमा दुई मोटरसाइकल आपसमा ठोक्किँदा एक जनाको मृत्यु भएको छ भने तीन जना गम्भीर र एक जना सामान्य घाइते भएका छन्।

Watch On

दुर्घटनामा मृत्यु हुनेमा गुलरिया नगरपालिका–११ निवासी २४ वर्षीय ओमकार थारु रहेका छन्। दुर्घटनामा गम्भीर घाइते भएका उनलाई उपचारका लागि भारतको लखनउ लैजाने क्रममा मृत्यु भएको हो।

प्रहरीका अनुसार भे ११ प ८५६७ नम्बरको मोटरसाइकल चालक बारबर्दिया नगरपालिका–३ बानियाभारका २५ वर्षीय आशिष थारु गम्भीर घाइते भएका छन्। उनको टाउकोमा चोट लागेको छ। सोही मोटरसाइकलमा पछाडि सवार बाँसगढी नगरपालिका–७ का १८ वर्षीय रमन थारुको टाउको र मुखमा सामान्य चोट लागेको थियो। कौशिल्या अस्पताल बाँसगढीमा उपचारपछि उनी डिस्चार्ज भइसकेका छन्।

त्यस्तै, भे ५ प ९१६१ नम्बरको मोटरसाइकल चालक भारतको लौकाइका १८ वर्षीय सहाबुदिन खान र पछाडि सवार २०/२२ वर्षीय जमाल खान पनि गम्भीर घाइते भएका छन्। दुवैको टाउको तथा अनुहारमा चोट लागेको छ।

प्रहरीका अनुसार दुर्घटना हिजो दिउँसो करिब १ बजे भएको थियो। विपरीत दिशाबाट आउँदै गरेका दुवै मोटरसाइकल मोतिपुर जंगलस्थित सडकखण्डमा आपसमा ठोक्किएका थिए।

दुर्घटनामा संलग्न दुवै मोटरसाइकल प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।