सभामुख अर्यालले हेटौँडाको सडक विस्तारदेखि सुरुङमार्गसम्मका विषयमा छलफल गरे

हेटौँडा । प्रतिनिधिसभाका सभामुख डोलप्रसाद अर्यालले शनिबार हेटौँडामा बागमती प्रदेशका प्रथम मुख्यमन्त्री डोरमणि पौडेल, प्रदेशसभा सदस्य प्रेमबहादुर पुलामी ‘छिन्तु’सहित उद्योगी–व्यवसायी, यातायात व्यवसायी, कानुन व्यवसायी र स्थानीयसँग छुट्टाछुट्टै भेटघाट तथा छलफल गरेका छन्।

Watch On

पूर्वमुख्यमन्त्री पौडेलसँगको भेटमा हेटौँडा र मकवानपुरको विकास, वन तथा मध्यवर्ती क्षेत्रभित्रका विकास निर्माणमा देखिएका समस्या, सडक तथा पूर्वाधार विस्तार र ती कामलाई सहजीकरण गर्ने विषयमा छलफल भएको सभामुखको सचिवालयले जानकारी दिएको छ।त्यस्तै, सभामुख अर्यालले विकास निर्माणका काममा देखिएका अवरोध हटाउने उपाय र आवश्यक सुझावबारे पौडेलसँग राय लिएका थिए।

प्रदेशसभा सदस्य प्रेमबहादुर पुलामी ‘छिन्तु’सँगको भेटमा हेटौँडाको सडक विस्तार, हेटौँडा–काठमाडौं सडक सञ्जाललाई सुरक्षित र भरपर्दो बनाउने, भीमफेदी सुरुङमार्ग तथा सडक पूर्वाधारसँग सम्बन्धित विषयमा छलफल भएको थियो।

त्यस्तै, मकवानपुर उद्योग वाणिज्य संघका अध्यक्ष प्रमोद सिंह रानाभाटले उद्योगी–व्यवसायीका समस्या र सुझाव सभामुखसमक्ष राखेका थिए। नारायणी यातायात व्यवसायी संघका अध्यक्ष सरोज खनालले यातायात क्षेत्रका समस्या तथा सरोकारबारे जानकारी गराएका थिए।

भेटघाटका क्रममा कानुन व्यवसायी, विभिन्न सरकारी तथा अन्य निकायका प्रतिनिधि र स्थानीयले पनि आ–आफ्नो क्षेत्रसँग सम्बन्धित समस्या, गुनासा र सुझाव सभामुखसमक्ष राखेका थिए।