श्रीमतीलाई खुशी पार्न नगरप्रमुखले घरमा लगे सरकारी स्कुटर

कैलाली । कैलालीको घोडाघोडी नगरपालिकाका प्रमुख खडक बहादुर रावतले श्रीमतीलाई खुशी पार्न नगरपालिकाको सरकारी स्कुटर घरमा लगेका छन् । नगरपालिकाको सरकारी नम्बर प्लेट भएको सुप. प्र.०१–००१ ब २०५९ नम्बरको स्कुटर आफ्नी श्रीमतीलाई दैनिक कामकाजमा सजिलो होस भन्ने उद्देश्यले नगरप्रमुख रावतले घर लगेका हुन । 

Watch On

मंगलबार बिहान छोरालाई विद्यालय पुराउन स्कुटरमा जान लागेकी उनकी श्रीमती यमुना रावतलाई हामीले बुझ्दा ‘आफ्नो सजिलोका लागि नगरप्रमुखले घरमा स्कुटर ल्याइदिएको’ बताइन् । त्यस्तै छोराको उपचारका लागी भन्दै आइतबार सो स्कुटर चलाएर नगरप्रमुख रावतकी श्रीमती घोडाघोडी नगरपालिका–१ मा रहेको घोडाघोडी अस्पताल पुगेकी थिइन । नगरप्रमुख रावतकी श्रीमती बिमा अभिकर्ता समेत भएका कारण बिमा पोलिसी खोज्न समेत सोही स्कुटर प्रयोग गर्ने गरेको पाइएको छ । 

तस्विर : मेयरको निवासमा राखिएको नगरपालिकाको स्कुटर

‘नगरपालिकामा कार्यरत महिला कर्मचारीलाई कामकाजमा सजिलो होस् भन्ने उद्देश्यले २०७८ चैत्र १७ गते नगरपालिकाले सो स्कुटर खरिद गरेको थियो ।’, नगरपालिका श्रोतले सिधाकुरालाई भने, ‘तर, केही महिनादेखि नगरपालिकामा स्कुटर देखिन छोडेपछि, महिला कर्मचारीलाई कामकाजमा निकै समस्या भइरहेको छ ।’

स्कुटर नहुँदा नगरको स्वास्थ्य शाखामार्फत प्रदान गरिने सेवासमेत प्रभावित भएका छन् । ‘स्कुटर नगरप्रमुखले घर लगेर राखेपछि दैनिकजसो वडामा गएर गर्नुपर्ने अल्ट्रासाउन्ड जस्ता कार्यहरू गर्न समेतमा कठिनाइ भएको छ ।’, नगरपालिकाकी एक कर्मचारीले गुनासो गरिन् ।

नगरपालिकाको सरकारी स्कुटर नगर प्रमुख रावतले आफूले प्रयोग गर्न भने लगेका हैनन् । उनले नगरपालिकाकै से. १ झ ३३५ नम्बरको स्कारपियो गाडी प्रयोग गरिरहेका छन् । तर स्कुटरको दुरुपयोग भएको विषयमा हामीले नगरप्रमुख रावतले सोध्दा उनले ‘आफ्नो सजिलोको लागि स्कुटर घरमा लगेको’ बताए छन् । 

मेयर रावतले सरकारी सवारीसाधन आफू अनुकुल घर पुर्याएको यो पहिलो घटना भने होइन । उनले यसभन्दा पहिले पनि आफूलाई सजिलोका लागि भन्दै नगरपालिकाको मोटरसाइकल घर लगेका थिए । तर, श्रीमतीले स्कुटर रहर गरेपछि नगरप्रमुखले मोटरसाइकल फिर्ता गरेर केहि महिना पहिले स्कुटर घर लगेका हुन् ।