खराब ब्याटिङ गर्दा उपाधि भिडन्तमा पिएनजीसँग नेपालले हार व्यवहोरेको छ । 

हङकङ मेन्स टी-२० सिरिजको उपाधि भिडन्तमा बुधबार हङकङमा भएको फाइनल खेलमा पपुवा न्युगिनी (पिएनजी) सँग नेपाल ८६ रनले पराजित भएको हो । पिएनजीले दिएको १७२ रनको लक्ष्य पछ्याएको नेपाल १६।३ ओभरमा ८५ रनमै अलआउट भएको थियो । 

टस जितेर फिल्डिङ रोजेको नेपाललाई, पहिले ब्याटिङ गरेको पिएनजीले ८ विकेटको क्षतिमा १७१ रन जोडेको थियो । उसका लागि ओपनर टोनी उराले ६१ रन, एलेइ नाओले १० बलमा नटआउट ३० रन बनाएका थिए । 

नेपालका लागि सबैभन्दा बढी रन जोडेका सन्दीप जोरा १७ रन जोडेर आउट भए । भने विवेक यादवले १ रन मात्र जोड्न सके । यस्तै केही समय टिकेका आरिफ शेख २० बलमा १५ रन जोड्दा सेसे बाउबाट बोल्ड भए ।

नेपालले ६ ओभरको पावर प्लेमा ३ विकेट गुमाउँदा ३४ रन मात्र जोड्न सकेको थियो । ओपनिङमा आएका विनोद भण्डारी तेस्रो बलमा ४ रनमा आउट भए भने तेस्रो ओभरमा कुशल भुर्तेल ५ रनमा पेभिलियन फर्के। दुवैलाई पिएनजीका मोरियाले बोल्ड गरेका थिए । 

यस्तै गुल्सन झा छैटौं ओभरको पहिलो बलमा ६ रनमा रनआउटको सिकार भए । यस्तै कप्तान रोहित पौडैल आठौं ओभरमा क्याच आउट हुँदा नेपालले चौथो विकेट गुमायो । उनले १२ रन मात्र जोड्न सके । त्यसपछि पनि नेपालको विकेट जाने क्रम रोकिएन ।

लोकेश बम पनि ६ रनमा कामियाको एलबिडब्लूको धरापमा परे । प्रतिश जिसी शून्य र करण केसी ३ रनमा आउट भए । बलिङमा पिएनजीका मोरिया, कामिया, चाड सोपर र सेसे बाउले २-२ विकेट लिए ।

नेपालका लागी आकाश चन्द र कुशल भुर्तेलले पिएनजी विरुद्ध ३-३ विकेट लिन सफल भएका थिए ।