कतारका राजा आउँदा विदा दिएको विषयमा रवि लामिछाने : तीन दशकदेखिका अभ्यास सच्याउन समय लाग्छ, धैर्य गरिदिनुहोस्

काठमाडाैँ । उपप्रधान एवं गृहमन्त्री तथा राष्ट्रिय स्वतन्त्र पार्टीका सभापति रवि लामिछानले कतारका अमिर शेख तमिम बिन हमाद अल थानीको नेपाल भ्रमणका क्रममा दिइएको सार्वजनिक बिदाको विषयमा प्रस्ट पारेका छन् । सोमबार बसेको मन्त्रीपरिषदले कतारका अमिरको नेपाल भ्रमणका क्रममा मंगलबार सार्वजनिक बिदा दिएपछि भएको चर्को आलोचनाको खण्डन गर्दै नेपालको पुरानो कुटनैतिक र राजनैतिक अभ्यास परिवर्तन गर्न समय लाग्ने र आफूहरु त्यस्ता अभ्यास सच्याउन तत्पर रहेको बताएका छन् । 

Watch On

मंगलबार सामाजिक संजाल फेसबुकमा एक स्टाटस लेख्दै उनले विधि नफेरीकन कोही व्यक्ति र राष्ट्रअनुरुप फरक फरक व्यवहार गर्न उचित नहुने र आफूहरुले पहिलेदेखिनै विरोध गर्दै आएका त्यस्ता प्रवृत्ति सच्याउन आफूहरु लागिरहेको बताएका छन् । ‘विधि नै नफेरीकन कुनै व्यक्ति, देश वा घटना हेरेर फरकफरक निर्णय गरिनु कुटनैतिक, राजनैतिक र बैधानिक हिसाबले सहि हुन्न। जे कुरा हिजो गलत भनिएको थियो त्यो आजपनि गलत नै हो, हिजोका अभिव्यक्तिहरुको गोताखोरी गर्नै पर्दैन। तर तीन दशकका अभ्यासहरुलाई सच्याउन समय त लाग्छ। धेरै काम हुँदैछन्, थोरै धैर्य गरिदिनु भए पुग्छ।’, लामिछानेले फेसबुकमा लेखेका छन् ।  

त्यस्तै उनले विगतमा भएका कयौँ नीति र परम्परा सच्याउनुपर्ने विषयमा आफूहरु दृढ रहेको र कतिपय विषयमा आफूले गृहकार्य गरेका कारण रिजल्ट समेत आउने क्रममा रहेको बताएका छन् । ‘विगतका कयौँ निर्णय र परम्परा छन्, जसलाई नीतिगत निर्णय गरि सच्याउनुपर्छ। अनावश्यक विदा, ‘भिआइपी सवारी’ का नाममा नागरिकले पाउने सास्ती, करोडौँ खर्च गरेर दिइने पदक सम्मान, आम माफीका नाममा पहुँचवाला अपराधीलाई मात्र छुट, सुरक्षाकर्मीलाई कामदार बनाउने परम्परा, केही भुतपूर्वहरुलाई दिइँदै आएको अभुतपुर्व सुविधा लगायतका तमाम विषयमा  पदबहाल गरेको दिन देखि नै लगातार काम गरिरहेको छु।  रिजल्ट आउदैछ।’, गृहमन्त्री लामिछानले ले लेखेका छन् । 

गृहमन्त्री लामिछानेले नेपाल भ्रमणमा आउने क्रममा रहेका अमिर शेख तमिम बिन हमाद अल थानीलाई स्वागत गर्दै लोकतन्त्रमा आफ्नो देशका नेतालाई नागरिकले आफ्ना कुरा मज्जाले भन्न पाउनुपर्ने र आगामी दिनमा पनि यस्तै खबरदारी गरिरहन आग्रह गरेका छन् ।