सुर्खेत । श्रम, रोजगार तथा सामाजिक सुरक्षा मन्त्री डोलप्रसाद अर्यालले उप प्रधान तथा गृह मन्त्री रवि लामिछानेमाथि लागेको आरोप निराधार रहेको बताएका छन् । शनिबार सुर्खेतमा पत्रकारहरु संग कुरा गर्दै मन्त्री अर्यालले गृहमन्त्रीमाथि लगाइएको आरोप १०० प्रतिशत निराधार भएको र न्यायलयमा मुद्दा पुगेको अवस्थामा न्यायलयको निर्णय अन्तिम रुपमा मान्ने बताएका छन् ।  

आफूहरू रूपान्तरणका लागि आएको तर अनेक तरिकाले हिलो छ्याप्ने काम भइरहेको भन्दै मन्त्री अर्यालले रास्वपाले सबै प्रश्नको जवाफ सदनबाट दिने बताए । नेपाली कांग्रेस प्रति लक्षित गर्दै मन्त्री आर्यालले संसदको जवाफ सुन्न सक्ने क्षमता नभएका कारण संसद अवरुद्ध भइरहेको बताए । 

प्रधानमन्त्री रोजगार कार्यक्रम अन्तर्गत स्थानीय तहका रोजगार संयोजक तथा सहायकहरुको क्षमता अभिवृद्धि कार्यक्रममा सहभागि भएका मन्त्री अर्यालले कर्णाली लगायत देशैभर प्रधानमन्त्री रोजगार कार्यक्रममा भइरहेको रकम दुरुपयोग र गुणस्तरहिनतालाई नयाँ सिराबाट अघि बढाउने बताए । 

मन्त्री अर्यालले कर्णालीमा अथाह सम्भावना भएको प्रदेशका रूपमा आफूले चिन्ने गरेको बताउँदै कर्णालीको जडीबुटी, बहुमूल्य ढुङ्गाहरू बेचेर नै धनी हुने सम्भावना रहेको बताए । कर्णालीबारे सधैँ नकारात्मक कुराहरू मात्र प्रचारमा आउने गरेको भन्दै उनले सञ्चारकर्मीहरूले पनि सकारात्मक र सम्भावनाका कुराहरूलाई प्रचारमा ल्याउनुपर्नेमा जोड दिए ।