नेकपा एकीकृत समाजवादीकाे दशौँ राष्ट्रिय महाधिवेशनको तयारी पूरा

काठमाडाैँ । नेकपा (एकीकृत समाजवादी) ले आइतबारबाट काठमाडौँमा सुरु हुने पार्टीको दशौँ राष्ट्रिय महाधिवेशनको तयारी पूरा भएको जनाएको छ । शनिबार काठमाडौँमा पत्रकार सम्मेलन गर्दै समाजवादीले राष्ट्रिय महाधिवेशनको बारेमा जानकारी गराउदै तयारी पुरा भएको जनाएको हो ।

Watch On

दक्षिणपन्थी अवसरवादको विरोध गर्रौ, समाजवादको दिशामा अगाडी बढौं भन्ने नाराका साथ हुने महाधिवेशनमा १ हजार ८ सय ४७ प्रतिनिधि सहभागी हुने समाजवादीले जनाएको छ । महाधिवेशनमा निर्वाचित हुनका लागि २१ पदाधिकारी र केन्द्रीय कमिटीको संख्या २ सय ९९ तय गरिएको छ । समाजवादीले एक कार्यकाल पूरा गरेका केन्द्रीय सदस्यहरुले पदाधिकारीमा प्रतिस्पर्धा गर्न पाउने व्यवस्था गरेको छ । अध्यक्ष पदमा प्रतिस्पर्धा गर्न पार्टीको स्थायी कमिटीको सदस्य हुन योग्यता पुगेको व्यक्ति हुनुपर्ने, उपाध्यक्ष, उपमहासचिव र सचिव बन्नका लागि पोलिटब्युरोको सद्यस्य बन्न योग्यता पुगेको व्यक्ति हुनुपर्ने समाजवादीले जनाएको छ ।

पत्रकार सम्मेलनमा नेकपा एकीकृत समाजवादीका अध्यक्ष माधव कुमार नेपालले राष्ट्रिय तथा अन्तराष्ट्रिय क्षेत्रले चासो राखेको महाधिवेशन निकै महत्वपूर्ण हुने बताए । उनले महाधिवेशनका लागि चारवटै दस्तावेज सर्वसम्मत रुपमा पारित गरेको भन्दै यसले कार्यकर्तामा उत्साह जागेको धारणा राखे । नेपालको राजनीतिमा दक्षिणपन्थी अवसरबाद हावी भएको भन्दै आफ्नो पार्टीलाई यसबाट जोगाउनुपर्ने आवश्यता रहेको भन्दै उहाले महाधिवेशनले नयाँ दिशाबोध गर्ने बताए । पार्टीमा पदको व्यवस्था हुनु स्वभाविक रहेको र सानो पार्टी हुँदा थोरै पद र ठूलो पार्टी हुँदा धेरै पद आवश्यकता परेको उहाको भनाइ छ । उनले पार्टीभित्रका नेताहरुबीच छलफल भेटघाट हुनुलाई अन्यथा लिनु नहुने भन्दै महाधिवेशनबाट नेतृत्व सहमतिमै चयन हुने विश्वास व्यक्त गरे । 

त्यस्तै पार्टीका सम्मानीत नेता झलनाथ खनालले महाधिवेशनले पारित गर्ने नीतिका आधार नेतृत्व निर्माण हुने बताए । पार्टीको नेतृत्व सर्वसम्मत ढंगले निर्माण गर्नुपर्ने उनले बताए । उनले नेताहरुकाबीचमा बहस हुनु स्वभाविक रहेको भन्दै आफुहरुबीच कुनै समस्या नरहेको दावी गरे । खनालले नेतृत्वका बिषयमा सहमति हुन नसके लोकतान्त्रिक विधिबाट नेतृत्व चयन गर्ने बताए । 

त्यस्तै पार्टीका महासचिव घनश्याम भुसालले आगामी लामो समय नेपालको कम्युनिष्ट आन्दोलनमा आफ्नो पार्टीले नेतृत्व गर्ने दावी गरे । इतिहासको दायित्व पूरा गर्न सक्नेगरी नेतृत्व एकताबद्ध अघि बढ्ने उनले बताए । 

महासचिव भुसालले पार्टीको महाधिवेशन आइतबार दिउँसो उद्घाटन हुने र त्यसअघि काठमाडौँका बिभिन्न स्थानबाट र्याली निकाल्ने जानकारी दिए ।