काठमाडाैँ । उपप्रधान तथा गृहमन्त्री रवि लामिछानेले विभिन्न २५ वटा ठूला भ्रष्टाचारका काण्डहरुको छानबिन गर्न शक्तिशाली आयोग गठन गर्ने तयारी रहेको बताएका छन्। सोमबार प्रतिनिधिसभा बैठकमा बोल्दै उनले आफू भ्रष्टाचार नियन्त्रणको काममा लागिरहेको बताएका हुन् । 

संसदमा मौखिक प्रश्नोत्तरका क्रममा बोल्दै गृहमन्त्री रवि लामिछानेले विभिन्न कालखण्डमा भएका ठूला भ्रष्टाचारको अनुसन्धान र भ्रष्टाचार नियन्त्रण लागि आफू इमानदार भएर प्रयासरत रहेको बताएका छन् । ‘भ्रष्टाचार नियन्त्रणका लागि हामीसँग संरचना नभएको हैन । संवैधानिक आयोगहरु छन्, अख्तियार नै छ । तर विभिन्न कारण र अड्चनहरुले गर्दा अपेक्षित प्रतिफल प्राप्त गर्न नसकेको जनगुनासो र माननीयहरुको गुनासो कायम नै छ ।...’, उनले थपे, ‘...मेरो र उसको नभनी सबैका पालामा चर्चामा आएका प्रत्येक प्रकरणको छानबिनका लागि राजनीतिक नेतृत्व तयार हुने र अख्तियार प्राप्त नेतृत्वले राजनीतिक स्वार्थ प्रेरित नभइ निष्पक्ष अनुसन्धान र अभियोजन गर्ने हो भने न्यूनीकरण हुँदै भ्रष्टाचार नियन्त्रण सम्भव छ ।’

त्यस्तै सांसद प्रेम सुवालको प्रश्नको जवाफ दिने क्रममा उनले २५ वटा भ्रष्टाचार काण्डहरुलाई छानबिन गर्नका शक्तिशाली आयोग गठन गर्ने तयारी रहेको बताएका छन् । ‘कुनै पनि कालखण्डमा भएका काण्डहरुमध्ये २५ वटा काण्डहरुलाई छानबिन गर्नका निमित्त शक्तिशाली आयोग गठन गर्ने तयारी रहेको कुरा मैले सम्मानित सदनमा गराइसकेको छु । त्यही भएर कोही पनि बेचैन हुनुपर्दैन’ गृहमन्त्री लामिछानेले भने ।