मौसम हेरेर खतराका संकेत देखिएका क्षेत्रमा रात्रि बस नचलाउने गृहकाे निर्णय, यात्रुलाई टिकट अनिवार्य

काठमाडौँ । गृह मन्त्रालयले खतराको संकेत देखिएका जिल्ला र क्षेत्रमा रात्रि बस सञ्चालनमा रोक लगाउने निर्णय गरेको छ । उपप्रधान तथा गृहमन्त्री रवि लामिछानेले प्रतिनिधि सभाको शुक्रबारको बैठकमा बोल्दै जल तथा मौसम विज्ञान विभागबाट जोखिमयुक्त क्षेत्र घोषणा गरिएका ठाउँमा रात्रि बस चल्न नदिने निर्णय भएको जानकारी गराए । 

Watch On

‘रेड ट्राभल एड्भाइजरी जारी भएका जिल्ला र क्षेत्रमा तत् तत् दिनमा रात्रिकालीन सवारी नचलाउने व्यवस्था यातायात व्यवस्था विभाग र यातायात व्यवसायीहरूले मिलाउने निर्णय भएको छ,’ लामिछानेले भने , ‘सबैतिर रात्रिकालीन सवारी बन्द गर्ने होइन। रेड ट्राभल एड्भाइजरी जारी जिल्ला र क्षेत्रमा तत् तत् बेला सवारी नचलाउने हो।’

पहिरो जाने र डुबान हुने सम्भावना देखिएका जोखिमयुक्त क्षेत्रमा सडक विभाग र ट्राफिक प्रहरीले जोखिमका संकेत चिह्नहरू राख्ने पनि गृह मन्त्रालयले निर्णय गरेको छ । 

शुक्रबार गृह मन्त्रालयमा रात्रिकालीन बस सञ्चालनको विषयमा यातायात व्यवसायीका प्रतिनिधिहरूसँग छलफल भएको थियो । छलफल पछि 

नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाले धेरै पानी परेको र पहिरो जाने जस्तो सम्भावना भएका ठाउँको सडकलाई रेड जोनका रुपमा हेरेर यातायात रोक्ने निर्णय भएको जनाए । साथै सिटौलाले यात्रुलाई टिकट काटेर मात्रै यात्रा गराउने निर्णय भएको जनाए । 

गृह सचिव एक नारायण अर्यालले मौसम पूर्वानुमान महाशाखाको ३ दिनको मौसम पूर्वानुमानलाई हेरेर भारी वर्षा हुने क्षेत्र अर्थात् रेड जोन एरियामा रात्रिकालीन बस नचलाउने निर्णय भएको जनाए । 

गृह मन्त्रालयका अनुसार पछिल्लो २४ घण्टामा बाढी, पहिरोबाट ३८ जिल्ला प्रभावित भएका छन् भने १७ जनाको मृत्यु भएको छ ।