काठमाडौँ महानगरपालिकाले दियो ९ सय ११ जनालाई रोजगारी

काठमाडौँ । काठमाडौँ महानगरपालिकाले महानगर मातहतको श्रम बैंकमार्फत् ९ सय ११ जनालाई रोजगारी दिएको छ । महानगरका मेयर बालेन शाहले स्टाटस लेख्दै महानगरमा रोजगारीका लागि आवेदन दिइएको र रोजगार मेलाले ९ सय बढीलाई रोजगारी दिन सफल भएको बताएका छन् । 

Watch On

मेयर शाहले ३ सय २९ जनालाई निजी क्षेत्रमा रोजगारीमा लगाइएको र ५ सय ८३ जनालाई सरकारी क्षेत्रमा रोजगारी प्रदान गरेको बताएका छन् । जसमा ५ सय ८३ जनालाई महानगरका विभिन्न विभागहरूमा रोजगारी उपलब्ध गराइएको बताएका छन् ।

त्यस्तै मेयर शाहले काठमाडौँ महानगरपालिकाले सञ्चालन गरेको सीप मेलामार्फत् दुई हजार ५ सय ५५ जना, महानगरको तालिम केन्द्रहरूमार्फत एक हजार ४ सय ६७ जना र अनलाइनमार्फत दुई हजार गरि जम्मा ६ हजार २२ जनाले तालिम लिएको समेत बताएका छन् । 

उनले भनेका छन्, ‘काठमाडौं महानगरले रोजगारी प्रवर्द्धनका लागि तीन वर्षको कार्ययोजना बनाइ कम्तिमा १५ हजार जनालाई तालिम तथा पाँच हजार जनालाई प्रत्यक्ष रोजगारी सिर्जना गर्ने उद्देश्यले गौरव योजना ‘रोजगारी र आयवृद्धि काठमाडौँको समृद्धि’ तथा ‘श्रम बैंक’ स्वर्णिम योजना अगाडि बढाएको हो ’।

उनले स्टाटसमार्फत दक्ष, अदक्ष र अर्धदक्ष युवाहरुले रोजगारी पाएको जानकारी दिएका छन् । उनका अनुसार श्रम बैंकमार्फत दक्ष ४ सय ५५, अर्धदक्ष ३८ जना र अदक्ष ४ सय १८ गरी जम्मा ९ सय ११ जनाले रोजगारी पाएका छन्। 

महानगरको सहजीकरण तथा आफ्नै प्रयासमा थप करिब ८ सय जना युवा युवतीहरु  रोजगार र स्वरोजगार भएको पनि महानगरको दाबी छ ।