यूराेपेली मुलुक बेल्जियममा बढ्दो चोरी, निसानामा नेपालीको घर

सन्तोष न्यौपाने, बेल्जियम । केही साताअघि लुभेन निवासी नन्द घले कामका लागि घरबाट कार्यालय निस्किए । श्रीमान् काममा गएपछि उनकी श्रीमतीले छोराछोरीलाई मन्टेस्वरीमा छोडेर उनी पनि काममा निस्किइन् । जब, उनीहरु कामबाट घर फर्के तब घरको स्थिती उनीहरुले सोचे भन्दा बेग्लै भइसकेको थियो । 

Watch On

घरमा चोर पसेर गरगहना र घरमा भएको रकम लिएर गएछ । घले परिवारका अनुसार घरको पछाडिको ढोका फोडेर चोर पसेका थिए । उनीहरुले तत्काल प्रहरीलाई खबर गरे । प्रहरीले सो चोरी प्रकरणमा अहिले अनुसन्धान गरिरहेको छ । यो त एउटा प्रतिनिधि घटना मात्रै हो । बितेको एक महिनामा आधा दर्जन नेपालीको घरमा चोरी भएको छ । गरगहना लगाउने नेपाली शैलीलाई पच्छ्याएर चोरहरुले सुनका गहना, महंगा लत्ता कपडा, नेपाली रुपैयाँ तथा युरो लिएर जाने गरेको प्रहरी अनुसन्धानमा देखिएको छ ।

युरोपियन मुलुक बेल्जियममा चोरीका घटना निरन्तर हुन्छन् भन्दा तपाईँ हामी धेरैलाई विश्वास नलाग्न सक्छ । तर, विगत लामो समयदेखि यो घटना नेपालीहरुको घरहरुमा लक्षित गरेर भइरहेको छ । लुभेन सहरमा धेरै नेपालीहरुको बसोबास रहेको छ । चोरले नेपालीका घरलाई लक्षित गरेर चोरी गरिरहेको देखिएको चोरीको घटना भोगेका नेपालीहरु बताउँछन् । 

गत वर्ष लुभेन निवासी पदम गुरुङ्गको घरमा पनि दिउँसै चोरी भएको थियो । त्यतिबेला उनकी श्रीमती मिरा नेपाल थिइन् भने छोरा–छोरी आफ्नो काममा बाहिर थिए । उनीहरुको घरबाट चोरले घर फोरेर ठूलो धन राशिका गरगहना, कपडा, रकम लिएर गएका थिए । यो केसमा पनि प्रहरीले आफ्नो अनुसन्धान गर्यो तर चोर फेला पार्न सकेन ।

पीडित नन्द घलेका अनुसार बेल्जियममा घरको इन्सुरेन्स गरिने हुदाँ केही रकम उनीहरुले बेहोर्छन । तर, बच्चाहरुले खुत्रुकेमा जम्मा गर्ने रकम, क्यास रकम, अनी सुन लगायतका गरगहनाहरुको भने उनीहरुले दिदैनन् । जसका कारण ठुलो क्षति बेहोर्नु पर्दछ ।  

चोरीका घटनाबारे लुभेन शहरस्थित प्रहरी कार्यलयमा सम्पर्क गर्दा उनीहरुले अघिल्लो वर्ष भन्दा चोरीका घटना बढेको बताए । विशेष गरेर शैक्षिक संस्था, ग्यारेज, एकल स्थानमा रहने घरहरुमा चोरी बढेको प्रहरीले बताएको छ । 

प्रहरीका अनुसार सन् २०२३ मा यो शहरमा २०९ घरमा चोरी भएकामा त्यो अहिले बढेर २६२ पुगेको छ । अघिल्लो वर्षको चोरीका घटनाहरु पछिल्लो १५ वर्षयताकै दोस्रो कम संख्या हो तर सन् २०२२ को तुलनामा ४२ प्रतिशतले बढी हो । 

नगरपालिका  र प्रहरीले सचेतना अभियानमार्फत  नागरिकहरूलाई सतर्क रहन र चोरहरूबाट बच्न प्रोत्साहित गरिरहेको छ । ‘सबै नगरिकहरुलाई घर सुरक्षाका बिभिन्न उपायहरु अबलम्बन गर्ने अनुरोध छ । चोरी नियन्त्रण गर्न हामी लागि लागिपरिरहेका छौँ’ लुभेन प्रहरीले भनेको छ । 

लुभेन शहरमा नेपालीहरु चोरीको घटनामा पर्नु कारण चोरहरुले नेपालीहरुको आनीबानी  र संस्कारलाई कमजोरीको रुपमा देखेको हुनसक्ने अनुमान गरिन्छ । नेपालीहरुले गर्ने कार्याक्रमहरुमा गरगहनाको प्रर्दशनी र तडक भडक देखिने र त्यसलाई चोहरुले कमजोरीका रुपमा लिएको हुनसक्ने बताइन्छ ।

यसै विषयमा एन आर एन बेल्जियमकी अध्यक्ष सीता सापकोटाले सबै सचेत भएर घरको सुरक्षामा लाग्नुपर्ने बताउँछिन् । ‘बिभिन्न कार्यकर्ममा जाँदा गरगहना धेरै नलगाउने, घरमा विशेष क्यामेरा जोड्ने, महत्वपूर्ण समान बैंक लकरमा राख्ने गर्नुपर्दछ,’ सापकोटा भन्छिन् ।