सबै कुरा

दाङको टरिगाउँ विमानस्थलबाट हप्ताको एक दिन मात्र उडान

सिधाकुरा

सोमबार, भदौ २४, २०८१

दाङको टरिगाउँ विमानस्थलबाट हप्ताको एक दिन मात्र उडान

दाङ । नेपाल वायुसेवा निगमले दाङको तुलसीपुरमा रहेको टरिगाउँ विमानस्थलमा हप्ताको एक दिन, अर्थात्, शुक्रबार मात्र उडान भर्ने भएको छ । निगमको एउटा जहाज ‘ग्राउन्डेड’ भएपछि यस्तो निणर्य गरिएको हो । निगमका दाङ प्रमुख बलबहादुर सुनारका अनुसार हाल प्रत्येक शुक्रबार मात्र उडानको व्यवस्था गरिएको छ ।

Watch On

हप्ताभर उडान गर्ने योजना भएपनि अहिले निगमसँग एक मात्र जहाज रहेकोले हप्ताको एक दिन मात्र उडान भर्ने नीति लिइएको उनको भनाइ छ । अब प्रत्येक शुक्रबार दिउँसो १२ बजे टरिगाउँमा जहाज आइपुग्ने र १२ः२० मा काठमाडौँ फर्किने समयतालिका रहेको छ । दाङबाट काठमाडौँ जाने भाडा सात हजार एक सय रुपैयाँ तोकिएको छ भने काठमाडौँबाट दाङ आउँदा यात्रुले सात हजार दुई सय ५० रुपैयाँ तिर्नुपर्ने छ ।

गत शुक्रबार काठमाडौँका लागि टरिगाउँबाट एक जना मात्र यात्रु रहेको र यसअघि विमानसेवा केही महिना अनियमित भएको पनि जानकारी गराइएको छ । विमानस्थललाई नियमित बनाउन विभिन्न तहबाट पहल भए पनि सफल भएको छैन ।

टरिगाउँ विमानस्थल २०११ सालमा स्थापना भएको हो। हाल यसको ७५० मिटर धावनमार्गमा १९ सिटे जहाज मात्र अवतरण गर्न सक्छ। धावनमार्गको लम्बाइ १,५०० मिटर पुर्‍याइएमा ७२ सिटे जहाजको उडान सम्भव हुने र सेवा नियमित हुने समेत अपेक्षा गरिएको छ ।

प्रकाशित मिति: सोमबार, भदौ २४, २०८१

प्रतिक्रिया दिनुहोस्