भू–माफियाले किर्ते गरेर विक्री गरेको केडिया परिवारको जग्गाबारे अनुसन्धान सुरु

वीरगंज । वीरगञ्जको आदर्शनगरस्थित केडिया परिवारको अधिग्रहणमा परेको जग्गाको अनुसन्धान गर्न नापी तथा मालपोत कार्यालय पर्साले प्रक्रिया अगाडि बढाएको छ । मालपोत कार्यालय पर्साले असली जग्गाधनी केडिया परिवारको हक कायम गराउन प्रक्रिया अघि बढाएको हो ।

Watch On

उक्त जग्गाको अनुसन्धान गर्न मालपोत कार्यालय पर्साको पत्रको आधारमा नापी कार्यालय पर्साले सर्वेक्षकमा संजय झालाई जिम्मेवारी दिएको थियो । जग्गा बेचबिखनमा ठुलो गिरोह संलग्न रहेको आशंकामा सो सूचना स्थगित गरिएको छ भने अनुसन्धानका लागि आइतबार संयुक्त टोली बनाएर जिम्मेवारी तोकिएको छ । जसका लागि नापी अधिकृत बब्लु पाण्डेको नेतृत्वमा ४ सदस्यीय अनुसन्धान टोली बनाइएको छ ।  उक्त समूहमा सर्वेक्षक राम प्रमोद राउत, संजय झा, र मोहन राय रहेका छन्। सो टोली भदौ २६ गते फिल्डमा खटिने गरी जिम्मेवारी तोकिएको छ । 

आइतबार नै नापी कार्यालय पर्साले वीरगञ्ज महानगरपालिकालाई साबिक श्रीपुर ९ ख किता नं १४ र १५ को जग्गा आदर्शनगर विस्तारको समयमा अधिग्रहणमा परेको वा नपरेको यकिन गरीदिन पत्राचार गरेको छ । त्यस्तै बुधबार हुने नाप नक्साका लागि वडा नं १३ मा पर्ने किता नं १५ र वडा नं १३ मा पर्ने किता नं १४ को विषयमा सम्बन्धित वडा कार्यालयका वडा अध्यक्ष, वीरगञ्ज महानगरपालिका लगायतलाई उपस्थिछि तथा सहयोगका लागि पत्राचार गरिएको सर्वेक्षक संजय झाले जानकारी दिए ।

रुकमनी देवी केडियाको नाममा २०२६ सालदेखि रहेको उक्त जग्गा हालसम्म उनकै नामबाट मालपोत कार्यालयमा रजिष्ट्रेशन रहेको छ । २०२९ सालमा सरकारले आधुनिक शहर बनाउन भन्दै वीरगञ्जको विभिन्न गाउँ पञ्चायतको जग्गा अधिग्रहण गरेको थियो, तर केडिया परिवारको जग्गा अधिग्रहणमा परेको थिएन ।

सोही जग्गा २०५८ सालमा कित्ता नम्बर १४ को ९ कठ्ठा र किता नम्बर १५ को २ कठ्ठा ६ धुर गरी जम्मा ११ कठ्ठा ६ धुर जग्गा नापी र श्रेष्ता कायम गरेर स्ववासी दर्ता गराइएको छ । 

त्यस्तै उनीहरुले विभिन्न व्यक्ति हुँदै उक्त जग्गा बैंकहरूलाई बेचेका थिए । उक्त जग्गाको अनुमानित मूल्य करिब सवा अर्ब रुपैयाँ पर्छ । हाल उक्त जग्गामा नबिल बैंक, एनआईसी एशिया बैंक, एभरेष्ट बैंक, महालक्ष्मी विकास बैंक, पुजन होटल, कन्ट्रीइन होटल र महालक्ष्मी डेकोरेशन रहेको घरधनीका नाममा आइपुगेको छ । उक्त जग्गाको हक कायम गराउन रुकमनी देवी केडियाका नाती प्रदीप कुमार केडिया लागिपरेका छन् ।

सम्बन्धित समाचार :

२३ वर्षपछि फेला पर्यो भू–माफियाले किर्ते गरेर विक्री गरेको केडिया परिवारको सवा अर्ब मूल्य बराबरको जग्गा