सबै कुरा

विरोध प्रदर्शन हुने देखेपछि अमेरिकामा आयोजित स्वागत कार्यक्रममा गएनन् प्रधानमन्त्री ओली

सिधाकुरा

सोमबार, असोज ७, २०८१

विरोध प्रदर्शन हुने देखेपछि अमेरिकामा आयोजित स्वागत कार्यक्रममा गएनन् प्रधानमन्त्री ओली

काठमाडौं । अमेरिकामा प्रधानमन्त्री केपी शर्मा ओली र परराष्ट्र मन्त्री डा. आरजु राणा देउवा सहभागी हुने भनिएको कार्यक्रम सुरक्षा खतरा देखाउँदै स्थगित गरिएको छ ।

Watch On

संयुक्त राष्ट्रसङ्घको ७९औँ महासभामा भाग लिन नेपाली प्रतिनिधिमण्डलको नेतृत्व गर्दै संयुक्त राज्य अमेरिकाको न्युयोर्कमा रहेका प्रधानमन्त्री ओेली र परराष्ट्र मन्त्री डा. राणाको स्वागत गर्न आयोजित कार्यक्रममा नेपालीहरू उपस्थित भइसकेपछि अन्तिम समयमा नेपाली दूतावासले सूचना जारी गर्दै स्थगित गरिदिएको हो ।

दूतावासले सुरक्षा संवेदनशीलता देखाउँदै कार्यक्रम स्थगन गरेको सूचना सार्वजनिक भएको छ ।

सूचनामा लेखिएको छ, 'संयुक्त राष्ट्र संघको महासभा, समिट अफ दी फ्युचर तथा अन्य साइडलाइन मिटिङ्गहरुमा व्यस्त रहनु परेको र समारोह स्थलको सुरक्षा संवेदनशीलताबारे संबन्धित निकायको सुझाव समेतलाई ध्यानमा राखी आज आयोजना हुने बृहत् कार्यक्रम स्थगन गरिएको छ'।

कार्यक्रम नेपाली महावाणिज्य दूतावास न्यूयोर्क र अमेरिकामा रहेका नेपाली समुदायले आयोजना गरेका थिए ।

न्यूयोर्कमा रहेका नेपालीहरुले प्रधानमन्त्री ओलीलाई कार्यक्रमस्थलमै कालो झण्डा देखाउने तयारी गरिरहेको जनाएका थिए । साथै कार्यक्रमस्थल बाहिर पनि प्रदर्शन गर्न सामाजिक संजाल आवह्न गरेका थिए ।

कार्यक्रममा प्रदर्शनको सामना गर्नूपर्ने अवस्था देखिएपछि प्रधानमन्त्री ओली तथा परराष्ट्रमन्त्री राणाले कार्यक्रम स्थगित गरेको न्यूयोर्कस्थित स्वागत कार्यक्रममा पुगेका एक नेपालीले बताए ।

संयुक्त राष्ट्र सङ्घको ७९औँ महासभामा भाग लिन नेपाली प्रतिनिधिमण्डलको नेतृत्व गर्दै प्रधानमन्त्री केपी शर्मा ओली स्थानीय समयअनुसार शुक्रबार राति न्युयोर्क पुगेका थिए । प्रधानमन्त्री ओलीले यही असोज १० गते संयुक्त राष्ट्र सङ्घको महासभामा सम्बोधन गर्ने कार्यतालिका रहेको छ ।

प्रकाशित मिति: सोमबार, असोज ७, २०८१

प्रतिक्रिया दिनुहोस्