पर्यटन क्षेत्रमा देखापरेका समस्यालाई समाधान गर्ने कार्यवाहक प्रधानमन्त्री सिंहकाे प्रतिबद्धता

काठमाडाैँ । कार्यवाहक प्रधानमन्त्री प्रकाशमान सिंहले पर्यटन क्षेत्रमा देखापरेका समस्यालाई समाधान गर्ने प्रतिवद्धता जनाएका छन् । 

Watch On

४५ औँ विश्व पर्यटन दिवसको अवसरमा शुक्रबार काठमाडौँमा आयोजित कार्यक्रममा मुलुकको समृद्धिको प्रमुख आधार पर्यटन क्षेत्र भएकाले यस क्षेत्रमा देखापरेका समस्यालाई सरकारले समाधान गर्ने प्रतिवद्धता जनाएका हुन् । नेपालको अर्थतन्त्रलाई सुधार गर्न समेत पर्यटन क्षेत्रको महत्वपूर्ण योगदान रहेको उनको भनाइ छ ।

उनले मुलुकलाई सन्तुलित रुपमा अघि बढाउनका लागि पर्यटन क्षेत्रबाट दिनसक्ने योगदानलाई बढाउँदै लैजानुपर्नेमा जोड दिए । मुलुकमा अस्थीरता देखिएपछि स्थीरता दिनका लागि वर्तमान सरकार गठन गर्नुपरेकाले जनताका लागि शसक्त रुपमा काम गर्ने उनले बताए ।

संस्कृति, पर्यटन तथा नागरिक उड्डयनमन्त्री बद्री पाण्डेले पर्यटन क्षेत्रलाई सुदृढ गर्नका लागि नागरिक उड्ययनको क्षेत्रलाई विश्वसनीय बनाउनुपर्ने भएकाले यसमा ध्यान केन्द्रीत गरेको बताए । आफु पदमा रहँदा काम गर्न नसके कुर्सी छाड्ने भन्दै उनले अन्य निकायका प्रमुखले पनि काम गर्न नसके सहज रुपमा बाटो खाली गर्न सुझाव दिए । मन्त्री पाण्डेले तीनै तहका सरकार र निजी क्षेत्रसँगको सहकार्यमा मुलुकलाई सुरक्षित र आकर्षक पर्यटकीय गन्तव्यको रूपमा विकास गर्ने गरि काम अघि बढेको धारणा राखे ।

‘सबैका लागि पर्यटनः पहुँचयोग्य विश्वव्यापी पर्यटनको प्रवर्दधन’ भन्ने नारासहित हरेक वर्ष २७ सेप्टेम्बरमा विश्व पर्यटन दिवस मनाउने गरिन्छ । नेपालमा भने ‘पर्यटन र शान्ति’ भन्ने नाराका साथ दिवस मनाइएको हो ।