रुपन्देहीको सरकारी वकिल कार्यालयमा रवि लामिछानेसँग आज पनि बयान लिइँदै

रुपन्देही । राष्ट्रिय स्वतन्त्र पार्टीका सभापति तथा पूर्वउपप्रधानमन्त्री एवं गृहमन्त्री रवि लामिछानेसँग रुपन्देहीकाे जिल्ला सरकारी वकिलको कार्यालयमा दोस्रो दिनको बयान सुरु भएको छ । बिहान १० बजेदेखि नै बयान लिन सुरु गरिएको हो ।

Watch On

मंगलबार करिब १२ बजे कास्कीबाट रुपन्देही पुर्याइएका लामिछानेलाई साँझ ५ बजेसम्म जिल्ला सरकारी वकिलको कार्यालयमा मौखिक बयान लिइएको थियो । जिल्ला सरकारी वकिल कार्यालयका न्यायाधिवक्ता प्रेमराज पौडेल लगायतले उनलाई २० बढी प्रश्न सेधेका थिए । लामिछानेले अधिकांस प्रश्नमा इन्कारी बयान दिएका छन् । 

मंगलबार मौखिक प्रश्नोत्तर गरिएकोमा आज लिखित बयान लिइएको हो । 

लामिछानेलाई बुटवलस्थित सुप्रिम ऋण तथा बचत सहकारीका प्रकरणमा बयानका लागि रूपन्देही लगिएको हो। सहकारीबाट गोर्खा मिडिया नेटवर्क प्रालिमा आएको रकम कार्यालय सञ्चालनमा खर्च गरेको कसुरमा रुपन्देही जिल्ला अदालतले पक्राउ पुर्जी जारी गरेको थियो ।

कात्तिक २ गते काठमाडौँको वनस्थलीस्थित राष्ट्रिय स्वतन्त्र पार्टीको केन्द्रीय कार्यालयबाट गिरफ्तारी दिएका लामिछानेलाई कात्तिक ४ गते जिल्ला अदालत कास्की पेस गरिएको थियो । लामिछानेलाई सुरुमा ६ दिन हिरासतमा राख्न प्रहरीले अनुमति पाएको थियो।

त्यसपछि दोस्रोपटक ७ दिनको म्याद थपिएकोमा तेस्रोपटक १० दिन थपिएको थियो। र चाैथाेपटक १३ दिन म्याद थपिएकाे थियाे ।

लामिछानेलाई पक्राउको विरोधमा रास्वपाले भने देशभरि विरोध प्रदर्शन गरिरहेको छ।