छविलाल जोशीलाई अस्पताल भर्ना, रविले मानेनन्

काठमाडौँ । सहकारी प्रकरणमा कास्की प्रहरीको हिरासतमा रहेका छविलाल जोशीलाई अस्पताल भर्ना गरिएको छ । स्वास्थ्यमा एक्कासी समस्या देखिएपछि कास्की प्रहरीले जोशीलाई बिहिबार साँझ पोखराकै गण्डकी मेडिकल कजेल शिक्षण अस्पतालमा भर्ना गरेको हो ।

Watch On

जोशीले एक्कासी छाती दुखेको बताएपछि उनलाई अस्पताल भर्ना गरेर राखिएको कास्की प्रहरीका प्रवक्ता डिएसपी वसन्त कुमार शर्माले जानकारी दिए । ‘हिजो साँझ एक्कासी छाति दुख्यो भन्नुभयो । त्यसपछि हामीले उहाँलाई तत्काल पोखराकै गण्डकी मेडिकल कलेजमा लगेर भर्ना गरेर राखेका छौँ ।’, शर्माले भने, ‘उहाँको स्वास्थ्य अवस्था हिजो जस्तो थियो, अहिलेपनि त्यस्तै छ । केही सुधार आएको छैन ।’

त्यस्तै कास्की हिरासतमै रहेका रवि लामिछानेको पनि पछिल्लो समय उच्च रक्तचाप देखिएका कारण प्रहरीले अस्पताल जानका लागि अनुरोध गरेको तर रवि लामिछानेले इन्कार गरेको बताइएको छ । ‘छविलाल जोशीलाई अस्पताल लाने क्रममा रवि लामिछानेलाई पनि लैजानका लागि प्रहरीले सोधेको थियो तर उहाँले मान्नुभएन ।’, एक प्रहरी अधिकृतले सिधाकुरासँग भने, ‘भित्र केही समस्या आएपनि मेरो मुटु दह्रो छ, म हिरासतमै आराम गर्छु भनेपछि प्रहरीले छविलाल जोशीलाई मात्र अस्पताल लगेको हो ।’

सहकारी अपचलनमा जोशी गत असोज ६ गते काठमाडौँबाट पक्राउ परेका थिए भने रवि लामिछानेलाई कात्तिक २ गते नेपाल प्रहरीको केन्द्रीय अनुसन्धान ब्यूरो सीआईबीले पार्टी कार्यालयबाटै पक्राउ गरेको थियो । 

ग्यालेक्सी टेलिभिजन सञ्‍चालन गर्ने क्रममा विभिन्न सहकारीबाट पैसा ल्याएको आरोपसहित उनीहरुलाई पक्राउ गरिएको हो । जोशी र लामिछाने हिरासतमा रहँदा मुख्य अभियुक्त जीबी राई भने अझै फरार छन् ।