काठमाडौँ । दलालको फन्दामा परेर युक्रेन सेनाको नियन्त्रणमा पुगेका  पुगेका दोलखाका स्याङ्बोशेर शेर्पा र तेह्रथुमका फुर्वा शेर्पा नेपाल फर्कीएका छन् । 

दोलखाका स्याङ्बोशेर  र तेह्रथुमका फुर्वा अपरान्ह् २ बजे त्रिभुवन अन्तराष्ट्रिय विमानस्थलमा अवतरण गरेका हुन् । उनीहरु मोल्दोभाबाट टर्किस् एयरलाइन्समार्फत  टर्कीको राजधानी स्तानबुल, स्तानबुलबाट एयर इन्डियाको जहाजमार्फत दिल्ली हुँदै नेपाल फर्कीएका हुन् । 

युद्धग्रस्त युक्रेनमा सपनाको खोजी गर्दै रोजगारीका लागि उडेका उनीहरु ९ महिना लामो अलपत्र जीवन भोगेर सङ्घर्षपूर्ण उद्धार पछि  नेपाल फर्किएका छन् । 

जर्मनीस्थित नेपाली दूतावास र गैरआवासीय नेपाली सङ्घको पहलमा उनीहरु युक्रेनबाट मोल्दोभा, त्यहाँबाट टर्की र दिल्ली हुँदै काठमाडौँ आएका हुन् । दलालले भिसा सकिनु भन्दा ७ दिनअघि युक्रेन पुर्याएका शेर्पा दाजुभाइलाई अवैध भन्दै युक्रेनको सेनाले नियन्त्रणमा लिएर होल्डिङ सेन्टरमा राखेको थियो । 

पासपोर्ट देखाएपछि आफ्नै देश फर्किएर जाउ भनेर पटक पटक मोल्दोभाको बोर्डसम्म युक्रेनका सेनाले पठाउँदा पनि उनीहरु आफ्नै देशको बेवास्ताले फर्कन सकेका थिएनन् । तर, जर्मनीको दूतावासमा राजदूत फेरिएपछि र गैरआवासीय नेपाली सङ्घले पहल थालेपछी उनीहरु नेपाल आउन सफल भएका हुन् । 

दलालले भन्थ्यो युद्ध छैन, आकर्षक तलब हुन्छ                   

गत असारमा उनीहरु दुवै जना नयाँ दिल्ली हुँदै आकर्षक रोजगारीको प्रलोभनमा युक्रेन पुगेका थिए । काठमाडौँबाट नयाँ दिल्ली र दिल्लीबाट मोल्दोभाको ट्रान्जिट भिसामार्फत उनीहरु विद्यार्थी भिसामा युक्रेन पुगे । 

स्याङ्बोशेरका अनुसार नेपालमा काम गरेर परिवार पाल्न नसकेपछि उनीहरु आकर्षक वैदेशिक रोजगारीको खोजीमा थिए । यही मेसोमा भेटिएका दलालले भारतबाट दिल्ली हुँदै मोल्दोभा भएर युक्रेन जान सकिने बताए  ।

युद्ध नभएको क्षेत्रमा आर्कषक जागिर र धेरै तलब पाइने प्रलोभनमा परेर आफूहरू युक्रेन आइपुगेको अर्का पीडित  फुर्वा शेर्पा बताउँछन् । तर, मोल्दोभाबाट युक्रेन छिरेको एक सातामै उनीहरु पक्राउ परे । युक्रेन सुरक्षा गार्डले पक्राउ गरेर उनीहरूलाई अवैध विदेशी घर फर्काइने शिविरमा राखेको थियो ।

शिविरमा लगिएको दिनदेखि नै आफूहरूको उद्धारका लागि दुवै जनाले हारगुहार गरिरहेको उनीहरूले सिधाकुरालाई बताए । तर, तत्कालीन जर्मनीस्थित नेपाली दूतावासले कुनै पहल गरेन । नेपालका लागि जर्मनीबाट युक्रेन मामला हेर्ने दूतावासमा उद्धारका लागि आग्रह गर्दा उल्टै किन आएको भन्दै थर्काएको स्याङ्बोशेर बताउँछन् । 

युक्रेनबाट उद्धारका लागि दूतावासदेखि परराष्ट्र मन्त्रालयसम्म धाउँदा पनि आफूहरुप्रति कुनै चासो नदेखाएपछि उनीहरु मिडियामार्फत उद्धार अपिलका लागि लागेका थिए । उनीहरूले कुनैपनि बाटो भएर प्रलोभनमा परेर युक्रेन नजान पनि सबैलाई अपिल गरेका छन् ।  

कसरी भयो उद्धार      

नेपाली दूतावास वर्लिनका नियोग उपप्रमुख शागर फुँयालकाअनुसार उनीहरुको नेपाल फर्किने टिकट निश्चित भएपछि युक्रेनी सेनाले दुबै जनालाई युक्रेनको लागि श्रीलंकन अनरीकाउन्सिलरको रोहवरमा मोल्दोभा सीमामा लगेर छोडिदिएका थिए । त्यसपछि उनीहरु मोल्दोभाबाट बिहीबार दिउँसो १५ः२० बजेको टर्किस् एयरलाइन्समार्फत नेपालतर्फ लागेका हुन् । फुर्वाकाअनुसार गैरआवासीय नेपाली सङ्घले टिकट निश्चित गरिदिएपछि घर फर्कने बाटो बनेको हो । उनीहरूले नेपाल फिर्ता प्रयास गर्ने सबैलाई धन्यवाद समेत दिए ।