मृगौला परीक्षण गर्ने समेत पैसा नभएर वीर अस्पतालबाट निकालिए लाकुरे दमाई

काठमाडाैँ : स्वास्थ्यमन्त्री मोहनबहादुर बस्नेतले बारम्बार ‘कोही नेपाली नागरिक उपचार गर्न नसकेर मर्नु पर्दैन’ भन्दै आएका छन् । 

Watch On

स्वास्थ्य मन्त्रालयमा आफ्नो सय दिन पूरा हुँदाको खुसियाली साट्दा होस् वा वीर अस्पतालको वार्षिकोत्सवको अवसरमा, विश्व अङ्ग प्रत्यारोपण दिवसको अवसरमा होस् वा नेपालगञ्जस्थित भेरी अस्पतालको निरीक्षण गर्ने क्रममा वा भनौँ जुनसुकै औपचारिक कार्यक्रममा पनि स्वास्थ्यमन्त्री मोहनबहादुर बस्नेत पटक पटक फलाक्ने एउटै वाक्य हो, ‘गरिब भएर उपचार गर्न नसक्नेको राज्यले निशुल्क उपचार गर्छ’ । तर उनको यो बोली व्यवहारमा भने रत्ति पनि लागू भएको छैन ।

उनले केही महिनाअघि मात्र वीर अस्पतालको १३४ औं वार्षिकोत्सव कार्यक्रममा सम्बोधन गर्दै उपचार अभावले कोही मर्नु पर्दैन भनेका थिए तर त्यही वीर अस्पतालको नेफ्रो वार्डको शय्या नम्बर ३९ मा मृगौलाको समस्या भएर आर्थिक अभावले उपचार नपाउँदा पीडाले छटपटाइरहेका छन् बाँकेका लाकुरे दमाई । 

आफूलाई बचाइदिन गुहार गर्दै देशकै पुरानो र ठूलो सरकारी अस्पतालको शय्यामा पुगेका दमाईले गरिबीका कारण उपचार पाएका छैनन् । 

बाँकेको खजुरा गाउँपालिका २ मा डेरा गरि बस्ने लाकुरे,  एक वर्षयता मृगौलाको रोगबाट ग्रसित छन् । आर्थिक अभावमा उपचार गराउन नसक्दा उनी अहिले उभिन समेत सक्दैनन् । यतिसम्म कि, पैसा नभएकै कारण उनको बायोप्सी ९रोग पत्ता लगाउन मासु परिक्षण गरिने प्रक्रिया ० समेत गर्न पाएका छैनन् । जसका कारण मृगौलामा समस्या भएपनि के समस्या भएको भनेर पहिचान भएको छैन् ।

सुरुमा स्वास्थ्यमा सामान्य समस्या देखापर्दा स्थानीय अस्पतालमा जाँच गराउँदै आएका दमाई पछिल्लो एक महिनायता दुई पाइला पनि हिँड्न नसक्ने भए । 

स्वास्थ्य अवस्था दिनानुदिन बिग्रिँदै गएपछि उनकी श्रीमती सिता परियारले गाउँपालिका र गाउँघरबाट करिब १ लाख रुपैयाँ चन्दा उठाएर १७ दिन अघि उनलाई काठमाडौँ ल्याएकी थिइन् । परिक्षण र औषधी खरिदमै सबै पैसा सकियो । अहिले सिटामोल खाने पैसा  समेत छैन । 

औषधी किन्ने समेत पैसा नभएपछि वीर अस्पतालले लाकुरेलाई घर जान भनेको छ । थप उपचारका लागि परिक्षण गर्नु पर्ने भएपनि पैसा नभएपछि थप परिक्षण हुन सकेको छैन । चिकित्सकले परीक्षणका लागि पैसा जोह गरेपछि आउनु भन्दै अस्पतालबाट डिस्चार्ज गरिदिएका छन् । 

वीर अस्पतालका अनुसार उनको मृगौलामा के समस्या देखा परेको हो भन्ने थाहा पाउन रेनल बायोप्सी अर्थात शरीरको जाँच गराउन भारतमा नमुना पठाउनुपर्छ । त्यसका लागि २५ हजार बढी पैसा लाग्छ ।  तर दमाई दम्पतीले उक्त पैसा जम्मा गर्न नसकेको अस्पताल प्रशासन बताउँछ । 

आफ्नो जीवनको भीख माग्दै काठमाडौँ आएका लाकुरेलाई उपचार र औषधी गर्ने पैसा नहुँदा चिकित्सकले गरेको अपमान खपिनसक्नु छ । 

चिकित्सकले विगत केही दिनदेखि औषधी किन्न लगाएपनि उनीहरूले औषधीसमेत किन्न सकेका छैनन् । अस्पतालले निशुल्क दिएको जाउलोको भरमा उनीहरु दिन कटाइरहेका छन् । 

अस्पतालले निस्केर जानु भन्दै डिस्चार्ज गरिदिएपछि यतिबेला के गर्ने भन्ने विषयमा दमाई दम्पती चिन्तित छन् । उपचार त परको कुरा, घर जाउँ गोजीमा एक रुपैयाँ समेत पैसा छैन्, नजाउँ त अस्पतालले बेड छोड भनिसके । अब अस्पतालको ढोकामा भिख माग्नुको विकल्प छैन । लाकुरे याचना गर्छन् ।

आर्थिक अभावकै कारण उपचार नपाएर  आफू मर्नुपर्ने अवस्थामा आएपछि सहयोगको याचना गरेका छन् । एक छाक कटाएर भएपनि आफूलाई सहयोग गरिदिन उनी अपिल गर्छन् । 

त्यस्तै अहिले उनलाई अस्पतालले डिस्चार्ज त गरिदियो तर घर फर्किने गाडी भाडा समेत नहुँदा उनीहरु अलपत्र भएका छन् ।

६० वर्षीया लाकुरे बाँच्न चाहन्छन् । त्यसका लागि सहयोगी मनहरूको खाँचो छ । तपाईँको सानो सहयोगले एक नेपालीले नयाँ जीवन पाउने छ । यदि कसैले लाकुरेलाई आर्थिक सहयोग गर्न चाहेमा तल दिइएको नम्बरमा सम्पर्क गर्न सक्नुहुनेछ । साथै दिइएको उनको बैंक खातामा समेत पैसा जम्मा गर्न सक्नुहुनेछ । 

नाम : लाकुरे दमाई

सम्पर्क नम्बर : ९८०२६४७३३४

बैंक खाता : कुमारी बैंक, रिमझिम बजार शाखा, बाँके (१७३०२८७९४१४००००१)