असिम शाहकाे प्रश्न: ‘लोडसेडिङको गरेकोमा धन्यवाद ऊर्जामन्त्रीलाई  दिने कि नयाँ एमडीलाई ?’

काठमाडौँ । राष्ट्रिय स्वतन्त्र पार्टीका सांसद असिम शाहले देशमा भईरहेको विद्युत अवरोध विषय संसदमा उठाएका छन् । उनले बिना जानकारी लोडसेडिङ भइरहेको भन्दै धन्यवाद उर्जामन्त्रीलाई दिने कि विद्यतु प्राधिकरणका नयाँ एमडीलाई भनेर प्रश्न गरेका छन्  । शुक्रबार प्रतिनिध सभाको शून्य समयमा यस्तो प्रश्न गरेका हुन् । उनले यस्तै चलिरहे जनताले ‘सरकारको बत्ती निभाइदिने दिन टाढा नरहेको बताए । अहिले अन्धकारमा सरकारको अनुहार झल्झली याद गरेका जनताले ८४ मा बिजुली बाल्दा पनि नदेख्लान् भन्दै व्यंग्य गरे । 

Watch On

उनले भने, 
‘संसदमा गम्भीर विषयमा बहस गरिरहेका हुन्छौँ र झ्याप्प बत्ती जान्छ ,संसदमा त इनभर्टर, जेनेरेटर, सबै छ, केही रोकिन्न। तर, आम नागरिकको घरमा यस्तो विशेष सुविधा छ र ? बत्ती जानासाथ, खाना आधा पाकेर रोकिन्छ, मोबाइल चार्ज हुँदैन, व्यापार ठप्प, जताततै अन्धकार। हिजो साँझ मात्र देशका धेरै ठाउँमा एकाएक बत्ती गयो। कसैको हस्पिटलको अपरेसन रोकियो होला, कसैको परीक्षा तयारी बिग्रियो होला। बेला बेला झ्याप्प झ्याप्प लाइट जानु नयाँ दैनिकी बनिसकेको छ । धेरै हावा चल्यो, बिजुली जान्छ, पानी पर्‍यो  बिजुली जान्छ। अहिले त न हावा न पानी त्यैपनि झ्याप्प बिजुली जान्छ। । अब धन्यबाद ऊर्जामन्त्रीलाई  दिने कि नयाँ एमडीलाई दिने हो सरकारले स्पष्ट पारिदिनु पर्‍यो ।’