न्यायाधीश फुयाल बिदामा, सारंगा इजलासमा

काठमाडौँ । बिचौलिया इनम सापकोटासँगको संवाद बाहिरिएपछि विवादमा तानिएका सर्वोच्च अदालतका न्यायाधीश हरि फुयाल बिदामा बसेका छन् । बिचौलिया विवादमा आफ्नो नामसमेत जोडिएको भन्दै हिजो इजलासमा नबसेकी न्यायाधीश सारंगा सुवेदी भने आज इजलासमा फर्किइन् । 

Watch On

सर्वोच्च अदालत स्रोतका अनुसार, न्यायाधीश फुयाल आज मंगलबारदेखि शुक्रबारसम्म बिदामा बसेका हुन् । ‘उहाँले १७ गतेदेखि २० गतेसम्मका लागि बिदा लिनु भएको छ’ सर्वोच्चका एक अधिकारीले भने । त्यसपछि  तिहार बिदा सुरू हुन्छ ।

कात्तिक १३ गते न्यायाधीश फुयाल र बिचौलिया सापकोटाबीचको संवाद सार्वजनिक भएको थियो । 

न्यायाधीश फुयालले सापकोटासँग भेट भएको स्वीकार गरेका छन् भने आफूसँगै अन्य न्यायाधीशहरूले पनि उनीसँग भेटेको फुयालले बताइसकेका छन् । 

विवाद सार्वजनिक भएपछि फुयालले इजलास छाडेका थिएनन् । यही विषयमा छलफल गर्न बसेको सर्वोच्चको फुलकोर्ट बैठकले सत्य तथ्य पत्ता लगाउन सम्बन्धित निकायलाई आग्रह गरेको थियो । 

यही प्रकरणमा आफ्नो नामसमेत जोडिएको भन्दै न्यायाधीश सारंगा सुवेदी कात्तिक १६ गते सोमबार इजलासमा बसिनन् । विवाद निरुपण नहुँदासम्म आफू इजलासमा नबस्ने उनको भनाइ थियो । 

तर, मंगलबार भने न्यायाधीश सुवेदी इजलासमा बसिनन् । उनी न्यायाधीश नृपध्वज निरौलासँग संयुक्त इजलासमा बसिन्, जुन इजलासले चार वटा मुद्दामा फैसला सुनायो ।