काठमाडौँ । सडकमै बच्चा जन्माएकी महिलालाई सुरक्षित प्रसुती गराउन सहयोग गर्ने महिला प्रहरीलाई कैलाली प्रहरीले सम्मान गरेको छ । महिला प्रहरी जवान चन्द्रिका देउवालाई जिल्ला प्रहरी कार्यालय कैलालीले नगद र प्रशंसापत्रसहित सम्मान गरेको हो ।  

मंगलबार बिहान कैलालीको गोदावरी नगरपालिका १ चैतन्यपुरमा चन्द्रा आचार्य प्रसव पिडाले छटपटाइरहेकी थिइन् । स्थानीय राम प्रसाद पाण्डेको आँगनमा आचार्य छट्पटिए पछि कसैले प्रहरीलाई खबर गरिदिएको थियो । प्रहरी चौकी खैरानाबाट प्रहरी हवल्दार सहित प्रहरी जवान चन्द्रिका देउवा यी महिला भएको ठाउँमा पुगेकी थिइन् । 

प्रहरीलाई पहिले महिलाले अस्वभाविक गतिविध देखाएको भनेर स्थानीयले खबर गरेका थिए । तर त्यहाँ पुग्दा महिला सुत्केरी व्यथाले छट्पट्टिएकी थिइन् । उनको पीडा रमिता मानेर हेर्ने थुप्रै थिए तर उनलाई सहयोग गर्न कोहि अघि बढेनन् । उनलाई छुँदा रोग लाग्ने भन्दै मान्छेहरु छेउछाउनै आएनन् ।  त्यसपछि प्रहरी जवान चन्द्रिकाले आफैँ ति महिलालाई सुत्केरी गराउन लागिन् । 

झण्डै एक घण्टामा महिलाले छोरालाई जन्म दिइन् । चन्द्रिकाले महिलालाई छोराको अनुहार देखाइदिइन् र आफ्नै अंगालोमा सुरक्षित राखिन् । 

बैतडीकी प्रहरी जवान चन्द्रिका प्रहरी सेवामा लागेकाो ११ वर्ष भयो । यो ड्युटीमा आइपर्ने सबै खाले काम गरिन् तर यस्तो अवस्थामा आमाको उद्धार गर्नु परेको थिएन । प्रसव पीडाले छटपट्टिएकी महिला देखेपछि र स्थानीयले दुरदुर गरेको देखेपछि ति महिलालाई बचाउनै पर्छ भनेर आँटेको देउवा बताउँछिन् । 

२ वर्षको छोराकी आमा समेत रहेकी चन्द्रिकालाई सुरुमा प्रसुती गराउन डर लागेपनि, कुनै हालतमा महिलालाई बचाउन पर्छ भनेर सहयोग गर्न लागेको बताउँछिन् । 

बच्चा जन्मिएको केहि बेरपछि अत्तरीया स्थित पद्मा अस्पतालबाट डाक्टर गणेश फुलारा सहितको टोली पुगेको थियो । डा. फुलाराका अनुसार अस्पतालको टोली पुग्ने बेलासम्म प्रहरी जवान चन्द्रिकाले आमा र बच्चालाई खतरा मुक्त गराइसकेकी थिइन् । 

इलाका प्रहरी कार्यालय अत्तरीयाका डिएसपी रणबहादुर चन्दका अनुसार सुत्केरी महिला सुर्खेतको भेरिगंगा ८ माइतीघर भएकी २४ वर्षीय चन्द्रा आचार्य हुन् । उनका श्रीमान् बझाङ थलाराका २४ वर्षिय डम्बर जोशी हुन् । 

केही सयम अघिनै श्रीमान् भारत तर्फ लागेपछि कैलालीमा चन्द्रा एक्लै थिइन् । स्थानीयले मानसिक अवस्था असामान्य भएकाले बेवारीसे अवस्थामा भेटिएको दाबी गरेपनि चन्द्रा त्यस्तो नभएको पद्यम अस्पतालका डाक्टर गणेश फुलाराले बताए ।