मन्त्रालयका महत्वपूर्ण विभागमा काम गरिरहेका सहसचिवलाई अध्यागमन पठाएको हुँः गृहमन्त्री

काठमाडौँ । विपक्षीको अवरोधका बिच रोष्टम पुगेका गृहमन्त्री रमेश लेखकले आफूले गृहमन्त्रालयमा महत्वपूर्ण विभाग सम्हालेका सहसचिवलाई अध्यागमन पठाएको बताएका छन् । संसदमा बोल्दै गृहमन्त्री लेखकले अहिले भ्रष्टाचारमा मुछिएका सहसचिव आफूले अन्य कुनै मन्त्रालयबाट नभई गृहमन्त्रालयमै कार्यरत कर्मचारीलाई अध्यागमन पठाएको बताए । 

Watch On

‘अध्यागमन कार्यालयमा कार्यरत सहसचिव मैले अन्य कुनै मन्त्रालयबाट सरुवा गरी ल्याएका अधिकारी होइनन्। गृह मन्त्रालय अन्तर्गत कसुरजन्य सम्पत्ति व्यवस्थापन विभागका महानिर्देशकको काम गरिरहेका सहसचिवलाई मैले अध्यागमन कार्यालय, त्रिभुवन अन्तर्राष्ट्रिय विमानस्थलमा सरुवा गरेको हुँ। निज सहसचिवले यसअघि मन्त्रालयका महत्वपूर्ण विभाग र प्रमुख जिल्ला अधिकारीको रुपमा काम गरिसक्नु भएको छ। त्यो मभन्दा अगाडिका माननीय मन्त्री ज्यूहरुबाट खटनपटन भएको थियो।’, गृहमन्त्रीले भने । 

त्यस्तै उनले आफूले कानुनबमोजिम नै निजामती तर्फको उपसचिवलाई निजी सचिव बनाएको स्पष्टिकरण दिएका छन् । उनले भने, ‘कुनै पनि मन्त्रीले आफूलाई सहयोग गर्न निजामती तर्फको उपसचिवलाई निजी सचिवको रुपमा तोक्ने कार्य गरिन्छ। सोही बमोजिम मेरो सचिवालयमा निजी सचिवको रुपमा एकजना उपसचिव रहेका छन्। अन्य कर्मचारीको खटनपटन कार्यचाप अनुसार मन्त्रालयले गर्ने गरेको छ।’