नेपालमा ‘क्याम्पा कोला’ भित्रियो, चौधरी ग्रुप र रिलायन्स इन्डस्ट्रिजको सहकार्यमा उत्पादन सुरु

काठमाडौँ । भारतको प्रतिष्ठित औद्योगिक समूह रिलायन्स इन्डस्ट्रिज र नेपालको अग्रणी औद्योगिक घराना चौधरी ग्रुप (सीजी) बीचको सहकार्यमा अब नेपाली बजारमा लोकप्रिय कोल्ड ड्रिंक ब्रान्ड ‘क्याम्पा कोला’को उत्पादन सुरु गरिएको छ ।

Watch On

भारतीय बजारमा पुनःस्थापित भइसकेको र अन्तर्राष्ट्रिय रूपमा चिनिएको कोल्ड ड्रिंक ब्रान्ड ‘क्याम्पा कोला’ अब नेपालमै उत्पादन हुनेछ । रिलायन्सको एफएमसीजी विङ रिलायन्स कन्जुमर प्रडक्ट्स लिमिटेड (आरसीपीएल) र सीजीबीचको सहकार्यमा ब्रान्डको उत्पादन तथा वितरण नेपालमा सुरु भएको हो।

क्याम्पा कोला, क्याम्पा लेमन, क्याम्पा अरेन्ज, इनर्जी ड्रिंक ‘गोल्ड बुस्ट’ र ‘बेरी किक’ नेपाली बजारमा उपलब्ध हुनेछन्। आरसीपीएलका कार्यकारी निर्देशक केतन मोदीले ५० वर्ष पुरानो ऐतिहासिक ब्रान्ड क्याम्पा कोलालाई चौधरी ग्रुपजस्तो विश्वसनीय साझेदारसँग मिलेर नेपाल ल्याउन पाउँदा उत्साहित भएको बताए । 

कम्पनीका अनुसार क्याम्पा कोला, लेमन र अरेन्ज स्वादको २५० मिलिलिटर बोतलको खुद्रा मूल्य ३० रुपैयाँ तोकिएको छ भने इनर्जी बेरी किकको मूल्य ४० रुपैयाँ हुनेछ।

चौधरी ग्रुपका प्रबन्ध निर्देशक निर्वाण चौधरीले यो सहकार्यलाई देशका लागि गौरवको रुपमा वर्णन गर्दै नेपाली उपभोक्तालाई गुणस्तरीय तथा ऐतिहासिक पेय पदार्थको स्वाद दिएर क्याम्पा कोलालाई लोकप्रिय बनाउने बताए । 

यस सहकार्यले नेपाल र भारतबीचको औद्योगिक सम्बन्ध सुदृढ गर्ने मात्र होइन, नेपाली उपभोक्ताको रोजाइमा नयाँ स्वाद थप गर्ने चौधरी ग्रुप (सीजी)ले अपेक्षा गरेको जनाएको छ ।