दीपक मनाङेको निर्वाचन क्षेत्रमा मनाङ–२ मा कार्तिक १७ मा उपनिर्वाचन हुने

मनाङ । हिमाली जिल्ला मनाङमा प्रदेशसभा क्षेत्र (२)को उपनिर्वाचन कार्तिक १७ गते हुने भएको छ । यो क्षेत्रबाट निर्वाचित  राजीव गुरुङ (दीपक मनाङे) अयोग्य ठहरिएपछि रिक्त भएको मनाङ–२ प्रदेशसभा सदस्य पदका लागि उपनिर्वाचन हुन लागेको हो । 

गत निर्वाचनमा प्रदेशसभा सदस्य पदमा गुरुङ सर्वसम्मत निर्वाचित भएका थिए । यो क्षेत्रमा प्रतिनिधिसभा सदस्य पदका लागि मात्र मतदान भएको थियो । 

उपनिर्वाचनका लागि निर्वाचन आयोगले जिल्ला निर्वाचन आयोगलार्य निर्वाचन तालिका पठाएको छ । निर्वाचन आयोगका अनुसार मनाङ–२ का लागि भदौ १३ गतेबाट निर्वाचन अवधि शुरु भएको छ । 
 
गत निर्वाचनमा मनाङ जिल्लामा छ हजार ७७९ कुल मतदाता रहेका थिए । कुल मतदातामध्ये चार हजार ८४५ अर्थात् ७१ दशमलव ४७ प्रतिशत मत खसेको थियो भने प्रतिनिधिसभा निर्वाचन क्षेत्र नं १ प्रदेशसभा निर्वाचन क्षेत्र (२) को चार हजार १९७ मतदाता रहेको निमित्त प्रमुख निर्वाचन अधिकृत गोविन्द प्रसादद अर्यालले जानकारी दिए । 

निर्वाचन आयोगका अनुसार उम्मेदवारको मनोनयन दर्ताका निम्ति आगामी असोज २१ गते निर्धारण गरिएको कार्यालयले जनाएको छ । त्यसैगरी भदौ २० मा निर्वाचन अधिकृतको कार्यालय स्थापना, असोज २५ मा निर्वाचन अधिकृतको कार्यालयबाट उम्मेदवारको अन्तिम नामावली र चिह्न वितरणको विवरण प्राप्ति, कात्तिक ११ गते मतदान अधिकृत, सहायक मतदान अधिकृत र अन्य कर्मचारीको नियुक्ति गर्ने तालिका निर्धारण गरिएको छ ।