दुर्गा प्रसाईँको आन्दोलनमा आएका महिलाहरूलाई मध्यरातमा युवा संघले लखेट्याे

काठमाडाैँ । दुर्गा प्रसाईँको आन्दोलनमा आएको भन्दै मंगलबार राति सुतिरहेका महिलाहरूलाई उठाएर खेदिएको भिडियो सामाजिक सञ्जालमा भाइरल भैरहेको छ । भिडियोमा पार्टी प्यालेसमा अधिकांश महिलाहरू देखिएका छन् । उनीहरु सुतिरहेका बेला ‘हेलो दिदीहरू, फोन गर्नु त युवा संघले लखेटे भनेर  तपाईंहरु ७ गतेको कार्यक्रममा आउनुभएको हो, तपाईंहरु उठिहाल्नु त, ल छिटो गर्नुस्, १० मिनेटको समय दिन्छौँ’ भन्दै फर्किन धम्क्याएको देखिन्छ । महिलाहरूले भने, ‘पर्खिनुस् न, लुगा त लाउन दिनुस्’ भन्दै याचना गरिरहेकाे देखिन्छ ।  

भिडियाेमा महिलाहरूले ‘उज्यालोसम्म हामीलाई बस्न दिनुस्, उज्यालो भएपछि हामी जान्छौँ’ भनिरहेकाे सुनिन्छ । तर  ‘हुँदैन’ भनेर तुरुन्त फर्किन चेतावनी दिएको भिडियोमा प्रस्ट सुनिन्छ । भिडियोमा आफूलाई युवा संघको बताउने युवकले, ‘युट्युबमा दुर्गा प्रसाईं भनेर कुर्लिएजस्तो होइन । देखाइदिन्छौँ भनेको होइन, अब हामी देखाइदिन्छौँ, सबैलाई काठमाडौँबाट लखेटेर’ भनेर बोलेको आवाज सुनिन्छ । भिडियोको अन्तिममा ‘दुर्गा प्रसाई पागललाई फोन गरेर युवा संघले लखेट्यो भनेर भन्नुस्’ भनिनएको छ ।

प्रसाईँको संयोजकत्वमा भोलि हुने कार्यक्रमका लागि काठमाडौँ बाहिर बाट आएका सर्वसाधारणलाई युवा संघले खेदेको राष्ट्र राष्ट्रियता धर्म संस्कृति र नागरिक बचाऔँ महाअभियानका सचिवालय सदस्य विजय कँडेलले बताउँछन् ।

उनका अनुसार सिन्धुपाल्चोक लगायतका जिल्लाबाट आएकाहरुलाई कोटेश्वरमा दुर्व्यवहार गरिएको छ भने अन्य जिल्लाबाट आएर विभिन्न पार्टी प्यालेसमा बसेकाहरूलाई मध्यरातमा निकालिएको छ ।

जडिबुटीको इन्देणी पार्टी प्यालेस र चाबहिलको एचआर पार्टी प्यालेसमा सुतिरहेका महिलाहरूलाई उठाएर बाहिर पठाइएको देखिन्छ । भिडियो सार्वजनिक भएपछि सामाजिक सञ्जालमा युवा संघको चर्को आलोचना भैरहेको छ । तर युवा संघले भने आफ्नो संलग्नता नरहेको दाबी गरेको छ ।

राष्ट्रिय युवा संघ नेपालका अध्यक्ष क्षितिज थेबेले यस्तो अमानवीय घटना गर्न युवा संघको निर्देशन नभएको बताए । थेवेले युवा संघको नाम पारेर कसैले व्यक्तिगतरुपमा गरेको हुन सक्ने भएकाले अहिले प्रहरीको सहयोग मागेर बुझ्न लागेको बताए ।

काठमाडौँ प्रहरी परिसरले भने मनोहरा खोला छेउको पार्टी प्यालेस भनिएपनि थप बुझ्ने काम भैरहेको जनाएको छ