ओली र प्रचण्ड आफैँले उमारेका ‘अरेली काँडो’ दुर्गा प्रसाईँ, च्वास्स–च्वास्स घोचिरहन्छन्

काठमाडौं । कुनै बेला ग्रिल उद्योगमा काम गर्ने, भैँसी फार्म चलाउने दुर्गा प्रसाईँ २०६४ पछि घरजग्गा व्यवसायमा लागेका थिए । पहिले माओवादीमा सक्रिय रहेर जेल परेको दावी गर्ने प्रसाईँको अवस्था घरजग्गा कारोवारले ह्वात्तै उकास्यो । उनको सम्बन्ध प्रचण्डसँग प्रगाढ बन्दैै गयो । उनले ओली र प्रचण्डलाई आफ्नो घरमा मार्सी भात खुवाएर माओवादी र एमालेको एकता गर्न छलफल गर्ने वातावरण बनाए । पछि उक्त छलफल सफल समेत भयो । तर नेकपा फुट्यो । प्रसाईँ ओली निकट देखिन थाले । ओलीले तामझामसाथ एमालेमा भित्र्याएर केन्द्रीय सदस्य बनाए । तर निर्वाचनमा टिकट नपाएपछि प्रसाईँ ओलीसँग पनि बिच्किए । अहिले उनी राजावादी भएका छन् । माओवादी, एमाले हुँदै राजावादी बनेका प्रसाईँ अहिले प्रचण्ड र ओली दुबैको लागि ‘अरेली काँडो’ बनेका छन् । उनले पीडित जनतालाई उचालेर व्यवस्था ढाल्ने धम्की दिईरहेका छन् । उनको यो धम्कीमा प्रतिक्रिया जनाएर प्रधानमन्त्री प्रचण्डले डराएको महसुस गराए । यता ओलीले पनि उनीविरुद्ध अभिव्यक्ति दिएपछि एमालेमा पनि ठूलै धक्का परेकोजस्तो गराईदिए । निर्णायक आन्दोलनमा होमिएको दावी गर्ने प्रसाईँले व्यवस्था परिवर्तनको धाक दिएपनि सम्भव छैन भन्ने सबैले बुझेका छन् । तैपनि एउटा व्यक्तिको धम्कीसँग सरकारको नेतृत्वकर्ता र प्रमुख पतिपक्षी समेत प्रतिकारमा उत्रनुले भने प्रसाईँको घमण्ड झनै बढाएको छ । दुर्गा प्रसाईँले उनीहरुलाई अझै सताईरहने निश्चित छ । 

Watch On