दुर्गा प्रसाईँको आन्दोलनमा ढुंगामुढा गर्नेलाई मुद्दा चलाउने नचलाउने भन्ने विषयमा छलफल गर्दै प्रहरी

सोमबार गौशालामा दुर्गा प्रसाईँको आन्दोलनमा गएर प्रहरी, सार्वजनिक तथा व्यक्तिगत सम्पत्तिमाथि ढुंगामुढा गर्नेलाई मुद्दा चलाउने वा नचलाउने भन्ने विषयमा छलफल भइरहेको नेपाल प्रहरीले बताएको छ । 

सोमबार गौशालामा भएको आन्दोलन पुगेर प्रहरीमाथि ढुंगा प्रहार गर्ने प्रसाईँ समूहका १५ जनालाई पक्राउ गरिएको जिल्ला प्रहरी परिसर काठमाडौँका एसपी कुमोध ढुंगेल बताए । 

पक्राउ पर्नेमा प्रसाईँका स्वकीय सचिव विनञ्जय थापा समेत रहेका छन् । त्यस्तै प्रहरीले भोजराज तिमल्सिना, यदुनाथ सिग्देल, सुजन खड्‍का, राजु तामाङ, ऊबहादुर रिजाल नितेश बास्तोला, हरि बिशुंखे, दिपक गोस्वामी, देवेन्द्र कार्की, भुवन परियार, युविन श्रेष्ठ, मेहरमान बस्नेत र दिपेश खड्कालाई पनि पक्राउ गरिएको छ । 

त्यस्तै आन्दोलनमा पुगेर अराजक अभिव्यक्ति दिने केहीलाई पक्राउ गरिएपनि उनीहरुलाई भने छोडिएको प्रहरीले जनाएको छ ।

गत मंसिर ७ गतेदेखि राजतन्त्र फिर्ता गर्नुपर्ने विषयलाई मुख्य एजेण्डा बनाएर नागरिक बचाउ आन्दोलनको नेतृत्व गरिरहेका प्रसाईँले दिनहुँ काठमाडौँका विभिन्न स्थानमा प्रदर्शन गर्दै आएका छन् । ७ गते बल्खुबाट आन्दोलन सुरु गरेका उनले सोमबार गौशालामा प्रदर्शन  गरेका थिए । प्रदर्शनका क्रममा उनका समर्थकले पूरै सडक ढाकेर बिचमै सुतेपछि उनीहरुलाई प्रहरीले हटाउने प्रयास गरेको थियो । हटाउने क्रममा मुठभेड हुँदा प्रहरी र आन्दोलनकारीबिच झडप भएको थियो । प्रहरीले भिडलाई तितरबितर गरेर स्थिति नियन्त्रणमा लिन केही राउण्ड अश्रुग्यास समेत प्रहार गरेको थियो । सो क्रममा आन्दोलनमा सहभागि भएका ३ दर्जन बढि घाइते भएका प्रहरीले जनाएको छ ।