गैँडा मार्ने ‘सिरियल किलर, ७ जना पक्राउ

काठमाडौं । यस अघिनै गैँडा मारेर जेल परेर छुटेका समूहले नै चितवन राष्ट्रिय निकुञ्जभित्र खाल्डो खनेर दुईवटा पोथी गैँडा मारेको खुलेको छ । 

सीआबी स्रोतका अनुसार सौराहा चपरचुली क्षेत्रभित्र खाल्डोमा पारेर २ पोथी गैँडा मारेको आरोपमा पक्राउ परेका ७ जना मध्ये केही यस अघि पनि गैँडा मारेर खाग तस्करी गरेको कसुरमा जेल परेर छुटेका व्यक्ति छन् । 

उनीहरूकै संलग्नतामा योजनाबद्धतामा २ पोथी गैँडा मारिएको निष्कर्षमा प्रहरी पुगेको छ । कात्तिक ३० गते खाल्डोमा मृत अवस्थामा खाग झिकिएका दुई गैँडा भेटिएका थिए । घटनामा संलग्न भएको आरोपमा प्रहरीले ७ जनालाई पक्राउ गरेको छ । पक्राउ परेकाहरूको साथबाट गैँडाको खाग समेत बरामद भएको छ । 

पक्राउ परेकाहरूको बयान अनुसार उनीहरूले गैँडा पानी खान हिड्ने बाटोको निगरानी गरि ४ वटा खाल्डो खनेका थिए । 

निकुञ्जको सुरक्षाका लागि खटिएको सेनाको चेकपोष्ट भन्दा करिब तीन किलोमिटरको दूरीमा खनिएका खाल्डोमा गैंडा मृत फेला परेका थिए । 

यसअघिसमेत गतवर्ष माघमा नवलपुरको मध्यबिन्दु नगरपालिका–२ नारायणी किनारमा पनि करेन्ट लगाएर दुईवटा गैँडा मारिएका थिए । 

चितवन राष्ट्रिय निकुञ्जको अभिलेखले पछिल्लो समय गैँडाको विभिन्न कारणले मृत्यु भइरहेको देखाउँछ । 

निकुञ्जको तथ्याङ्कअनुसार २०७८ मा मात्रै ३७ गैंडा मृत भेटिएका थिए । त्यस्तै २०७९ मा पनि विभिन्न कारणले २२ वटा गैँडाको मृत्यु भएको थियो । नेपालमा दुर्लभ एक सिंगे गैँडाको संख्या ७५२ छ । त्यसमध्ये करिब ६९४ गैँडाको बासस्थान चितवन राष्ट्रिय निकुञ्ज हो ।