लुम्बिनीमा विश्व शान्ति कार्यक्रमको आयोजन, विभिन्न देशका २५ अर्बपति सहभागी

काठमाडौँ । लुम्बिनीमा बिहीबारदेखि विश्व शान्ति कार्यक्रम सुरु भएको छ । लुम्बिनीको अन्तर्राष्ट्रिय बुद्धिस्ट कन्फरेन्स हलमा सुरुभएको कार्यक्रम तीनदिन सम्म कार्यक्रम चल्ने आयोजकले जानकारी दिएको छ । 

Watch On

कार्यक्रमको पहिलो दिन बिहीबार इथियोपियाका पूर्वप्रधानमन्त्री ताम्रत लेनसँग सुधांसु दाहालले आध्यात्मिक रूपान्तरण, नेतृत्व, विश्व शान्तिबारेका सिकाइ तथा समुदाय सशक्तीकरणसम्बन्धी संवाद गरेका छन् । ताम्रतले भने, ‘विभिन्न देशबाट हामी आएका छौं, हामी सबैको चाहना नै शान्ति हो’ ।

कार्यक्रममा जीवन विज्ञान प्रतिष्ठानका एलपी भानु शर्माले नेपालमा १९ हजार वर्ष पुरानो आध्यात्मिक इतिहास रहेको चर्चा गर्दै मेडिटेसनसम्बन्धी प्रस्तुति दिएका थिए । भने अभिनेता राजेश हमाल, ट्रेजर कार्बन ग्रुपकी सीईओ सुसन झुले ‘किनोट स्पिच’ दिएका थिए ।

त्यस्तै, शनिबारसम्म हुने कार्यक्रममा विभिन्न देशका २५ अर्बपति सहभागी रहने आयोजकले जनाएको छ । नेपाल तथा विदेशका नेता, विद्वान्, संयुक्त राष्ट्र संघका सांस्कृतिक राजदूतहरू, अन्तर्राष्ट्रिय व्यापारमा नाम कमाएका व्यवसायी, कलाकार, युवा र सामुदायिक प्रतिनिधिहरूको पनि सहभागिता जनाएका छन् ।

तीन दिनसम्म चल्ने कार्यक्रममा शान्ति, जलवायु परिवर्तन, विकास, आन्तरिक कल्याण र सामाजिक न्याय लगायतका विषयमा बहस हुनेछ। स्थानीय शासनमा केन्द्रित युवा, महिला, आदिवासी समुदाय र सीमान्तकृत आवाजलाई पनि कार्यक्रममा समेटिने कार्यक्रम संयोजक शेखर गौतमले बताए ।

त्यस्तै, कार्यक्रममा सांस्कृतिक प्रदर्शनी, संगीत र कलात्मक अभिव्यक्तिका सत्रहरु पनि सञ्चालन  हुने जनाइएको छ ।