जय मातृभूमि पार्टीको एक प्रतिनिधिमण्डलद्वारा प्रधानमन्त्रीलाई ज्ञापनपत्र

काठमाडौँ । सम्माननीय प्रधानमन्त्री सुशीला कार्कीसमक्ष जय मातृभूमि पार्टीको एक प्रतिनिधिमण्डलले भेट गरेर बिहीबार ज्ञापनपत्र बुझाएको छ।

Watch On

उक्त पार्टीले केवल चुनावको तयारीमा मात्र नलागी सरकारले सुशासनको मूल कार्यादेशमा केन्द्रित हुनुपर्ने धारणा व्यक्त गरेको पधानमन्त्रीको सचिवालयले जानएको छ । प्रतिनिधिमण्डलमा पार्टीका वरिष्ठ नेता क्याप्टेन केबी लिम्बू, सहअध्यक्ष रामशरण पाण्डे, महासचिव गोविन्द गिरीलगायतले प्रधानमन्त्रीलाई भेटेका हुन ।

पार्टीले निर्वाचनको वातावरण बनाउन जेनजी आन्दोलनका दमनकारी र भ्रष्टाचारीमाथि शीघ्र कारबाही हुनुपर्ने माग राखेको छ। यो सरकारको मूल मुद्दा नै भ्रष्टाचारविरुद्धको कारबाही रहेकाले यसैमा केन्द्रित रहेर आफ्ना काम–कारबाही अघि बढाउनुपर्ने उनीहरुले माग गरेका छन् ।

उक्त कार्यक्रममा सम्माननीय प्रधानमन्त्री कार्कीले उक्त दललाई आफ्ना एजेन्डा लिएर चुनावमा जान सुझाव दिएकी थिइन । भ्रष्टाचारविरुद्धको कारबाहीलाई पनि सँगसँगै अघि बढाइरहेको उनको भनाइ थियो । प्रधानमन्त्री कार्कीले राजनीति गर्नेहरुले केवल भाषण गरेर विचार मात्रै पोख्ने गरेकाले अब मुलुकमा उत्पादनलाई केन्द्रमा राखेर काम गर्ने पार्टीको आवश्यकता रहेको बताएकी थिइन ।

प्रधानमन्त्री कार्कीले भनिन्, ‘खाली विचार मात्र पोख्ने दल धेरै भए। काम र रोजगारीमा केन्द्रित रहेर काम गर्ने भएनन्। यही कारण मुलुकको आर्थिक अवस्था कमजोर भयो। रोजगारीका अवसर मुलुकमा भएनन्। विदेश पलायन हुनुपर्ने बाध्यता बन्यो । यसको परिणाम के भयो भन्दा युवामा वितृष्णा बढ्यो। आन्दोलन भयो। अब यस्तो आन्दोलन हुनु नपर्ने गरी काम गरौँ।’