कञ्चनपुर २ मा रास्वपाबाट दिपक बोहरा उम्मेदवार बन्दै

काठमाडौँ । फागुन २१ गते हुने प्रतिनिधिसभाको निर्वाचनका लागि राष्ट्रिय स्वतन्त्र पार्टी (रास्वपा) का सचिवालय सदस्य दीपक बोहरा कञ्चनपुर २ बाट उम्मेदवार हुने भएका छन् । 

रास्वपाका संस्थापक समेत रहेका बोहराले सामाजिक सञ्जालमा स्टाटस राख्दै आफ्नो नाम एकल सिफारिस भएको जनाएका छन् । रास्वपा कञ्चनपर क्षेत्र न २ को क्षेत्रीय कमिटीले बोहराको नाम एकल सिफारिस गरेको छ । 
रास्वपाका क्षेत्रीय संयोजक गणेश खड्काका अनुसार शुक्लाफाँटा, बेदकोट र कृष्णपुर नगर समितिसहित ती नगरका सबै वडाका प्रतिनिधि र अन्य आकांक्षी उम्मेदवारको संयुक्त बैठकले बोहरालाई सर्वसम्मत सिफारिस गरेको हो ।
बोहराका लागि झंकर जोशी र घनश्याम विष्ट प्रस्तावक तथा समर्थक रहेका छन् । जोशी यसअघि कञ्चनपुर–२ बाट प्रतिनिधि सभा सदस्यमा प्रतिस्पर्धा गरेका थिए भने विष्ट अहिले उम्मेदवारका लागि आकांक्षी थिए ।

सिफारिस भएकापछि फेसबुकमा सिफारिस गर्ने  सबैप्रति आभार व्यक्त गरेका बोहराले लेखका छन्, ‘कञ्चनपुर क्षेत्र नम्बर–२ बाट रास्वपा उम्मेदवारका रूपमा मलाई सर्वसम्मत सिफारिस गर्नुभएकोमा आभारी छु । पार्टी पङ्क्तिको यो विश्वास धरमराउन दिने छैन । अन्य आकांक्षी घण्टी मित्रहरूको त्यागको उच्च सम्मान गर्ने छु । र, उहाँहरूको न्यायको पक्षमा सधैँ उभिनेछु ।’
रास्वपा सभापति रवि लामिछानेमाथि भएको प्रतिसोधका विरुद्धमा बोहराकै नेतृत्वमा हस्ताक्षर अभियान चलाइएको थियो । 
कञ्चनपुर २ मा अघिल्लो चुनावमा नेपाली कांग्रेसका उम्मेदवार एनपी साउद विजयी बनेका थिए । उनले २८ हजार १ सय मत ल्याउँदा एमालेका नरबहादुर धामीले २१ हजार ६४५ मतसहित दोस्रो स्थानमा रहेका थिए ।