लुटपाट तथा चोरीमा संलग्न आरोपमा काठमाडौँबाट चार जना पक्राउ

काठमाडौँ । काठमाडौँबाट चोरी तथा लुटपाटमा संलग्न रहेको आरोपमा चार जना पक्राउ परेका छन् । लुटपाट तथा चोरीमा संलग्न रहेको आरोपमा उनीहरुलाई पक्राउ गरिएको जिल्ला प्रहरी परिसर काठमाडौँले जनाएको हो ।

Watch On

पक्राउ पर्नेहरुमा काठमाडौंको दक्षिणकाली नगरपालिका–२ का सरोज खड्का, काभ्रेपलान्चोक महाभारत गाउँपालिका–७ घर भइ हाल काठमाडौं काँडाघारी बस्ने विकाश लामा, तनहुँको म्याग्दे गाउँपालिका–५ घर भइ जिल्ला काठमाडौंको टोखा बस्दै आएका राजु गुरुङ र ललितपुरको ललितपुर महानगरपालिका–७ का सुवास मगर रहेको प्रहरीले जनाएको छ ।

उनीहरुले मंगलबार बिहान ११ बजेको समयमा जिल्ला काठमाडौं, काठमाडौं महानगरपालिका ९ सिनामंगल गोल्डेनगेट अगाडीबाट बसमा चढी काठमाडौंको मित्रपार्क जाने क्रममा एक युवकको साथमा रहेको दुई लाख ७५ हजार लुटिएको र बुधबार बसमा यात्रा गर्ने क्रममा काठमाडौंको सिनामंगलबाट एक महिलाको सुनको सिक्री हराएको थियो ।

सोही सूचनाको आधारमा प्रहरी वृत्त गौशालाबाट खटिएको प्रहरी टोलीले खोजतलास गर्ने क्रममा बुधबार काठमाडौं महानगरपालिका ८ तिलगंगाबाट उक्त कार्यमा संलग्न रहेको खुल्न आएकाले उनीहरु चार जनालाई पक्राउ गरिएको प्रहरीले जनाएको छ । पक्राउ परेका चारै जनालाई नियन्त्रणमा लिई काठमाडौं जिल्ला अदालतबाट पाँच दिनको म्याद थप भई अनुसन्धान भइरहेको प्रहरीले जनाएको छ ।