रवि लामिछानेको जनसम्पर्क कार्यक्रममा नवलपरासी प्रशासनको अड्को, आचारसंहिता ध्यानमा राख्न आग्रह

नवलपरासी । नवलपरासी जिल्ला प्रशासन कार्यालयले राष्ट्रिय स्वतन्त्र पार्टी नवलपरासीलाई निर्वाचन आचारसंहिताका विषयमा सतर्क गराएको छ । रास्वपा सभापति रवि लामिछाने सहभागी हुने जनसम्पर्क तथा घण्टी अभिवादन कार्यक्रममा आचारसंहिता विपरीताका गतिविधि नगर्न सतर्क गराएको हो।

जिल्ला प्रशासन नवलपरासीले सोमबार विज्ञप्ति जारी गर्दै पार्टी सभापति रवि लामिछानेको मंगलबारको कार्यक्रमप्रति ध्यानाकर्षण भएको बताएको हो।

Watch On

‘प्रतिनिधि सभा सदस्यको आसन्न निर्वाचनलाई स्वतन्त्र, निष्पक्ष, स्वच्छ, पारदर्शी, मितव्ययी तथा भयमुक्त वातावरणमा सम्पन्न गर्न निर्वाचन आयोगद्वारा निर्वाचन आचारसंहिता, २०८२ लागु भई परिपालना सम्बन्धमा मिति २०८२ साल माघ १४ गते सूचना समेत जारी भएको व्यहोरा विदित्तै छ।

उपर्युक्त सम्बन्धमा माघ २७ गते यस जिल्लामा राष्ट्रिय स्वतन्त्र पार्टीका सभापति रवि लामिछानेको जनसम्पर्क तथा घण्टी अभिवादन कार्यक्रम रहेको सूचना प्राप्त हुन आएकाले सो सम्बन्धमा निर्वाचन आचारसंहिता, २०८२ आकर्षित हुने गरी निर्वाचन आचारसंहिता विपरितका गतिविधि नगर्नु, नगराउनु हुन सम्बन्धित सबैमा जानकारी गराइन्छ,’ जिल्ला प्रशासन कार्यालयले सूचनामार्फत् भनेको छ।

रास्वपा सभापति रवि लामिछाने अहिले देश दौडाहामा छन् । उनले विभिन्न जिल्ला पुगेर उम्मेदवार तथा मतदाता भेटघाट गर्ने गरेका छन् । 
यस अघि चितवन, नवलपरासी पूर्व, रुपन्देही लगायतका क्षेत्रमा पुगेका लामिछाने आज नवलपरासी पुगेका छन् । उनी नियमितरुपमा सुभेच्छुक भेटघाट गर्दै अघि बढेका छन् । 

सभापति लामिछानेसँगै रहेका रास्वपा नेता प्रमोद न्यौपानेका अनुसार सभापतिले सामान्य भेटघाटकै लागि पुग्दा पनि सुभेच्छुकहरु ठुलो संख्या उपस्थित हुने गरेका छन्  । रास्वपाले कुनै पनि निर्वाचन आचारसहिंता उलंगन हुने गरी कार्यक्रम तय नगरेको उनले बताए । 
 
रास्वपा  अनुसार सभापति लामिछाने नवलपरासीका दुई निर्वाचन क्षेत्र जाने कार्यक्रम छ। त्यहाँ उम्मेदवार र पार्टीका नेता कार्यकर्तासँग भेटघाट गरेर फर्कने कार्यक्रम तय गरिएको रास्वपाले बताएको हो।