निर्वाचन २०८२: चुनाव भयो, अब के हुन्छ ?

बिहान ७ बजे भोट हाल्न लाइनमा बस्दा नै मतदातामा निकै ठूलो उत्साह थियो । 

बिहान देखिएको त्यो उत्साह साँझसम्मै देखियो । 

Watch On

मतदानमा जनताको उत्साहजनक सहभागिता देखियो ।

उत्साहजनक सहभागिता, शान्तिपूर्ण निर्वाचन । यो निर्वाचनका मुख्य विशेषता यिनै हुन् ।

निर्वाचन आयोगले भनेको छ, करिव साठी प्रतिशत मत खस्यो । विषम परिस्थितिमा अनि आकस्मिक रुपमा भएको निर्वाचनमा देखिएको यो सहभागितालाई पक्कै पनि सामान्य मान्न सकिँदैन । 

शान्तिपूर्ण रुपमा भोट हाल्न पाएकोमा मतदाता खुसी छन् । शान्तिपूर्ण निर्वाचन भएकोमा राजनीतिक दल र उम्मेदवारहरु खुसी छन् । शान्तिपूर्ण चुनाव गराउन सकेकोमा निर्वाचन आयोग खुसी छ । आफ्नो जिम्मेवारी पूरा गर्न सकेकोमा सरकार खुसी छ । मतदानलाई शान्तिपूर्ण गराउन सकेकोमा सुरक्षा निकायहरु खुसी छन् । बेखुसी कोही छैन । 

के यत्ति मात्रै हो त ? होइन । यो निर्वाचनमा पनि कतिपयले धमिलो पानीमा माछा मार्न सकिन्छ कि भनेर प्रयास गरेकै थिए । सुरुमा चुनावकै मिति सार्न खोजे, सम्भव भएन, त्यसपछि चुनाव नै हुन नदिन खोजे, त्यो पनि हुन सम्भव भएन । निर्वाध रुपमा चुनाव भयो । अब सबै जना मतपरिणामको प्रतीक्षामा छन् । 

केही ठाउँमा चुनाव बिथोल्न सकिन्छ कि भनेर केही व्यक्ति र केही समूह लागे । दोलखा, ओखलढुंगा, सर्लाही, स्याङ्जा, धादिङ लगायतका केही जिल्लामा डिस्टर्ब गर्ने प्रयास पनि गरिए ।

तर, भोट हाल्न उत्साहित मतदाताको अगाडि ती कुनै पनि तत्वको स्वार्थ पूरा हुन पाएन । निर्वाचन आयोग, सुरक्षाकर्मी अनि दलहरुको संयमता र सुझबुुझले त्यस्ता सबै हर्कत परास्त भए । मतदाताले शान्तिपूूर्ण रुपमा मतदान गरे, पहिलो जित यहीँ भयो । 
मतदान भयो । अब धेरैको चासो छ, नतिजा कस्तो आउला ? 

धेरैले त अनुमान गरिसकेका छन्। 

एउटा कुरा निश्चित भएको छ । २०५६सालपछि देशले पहिलो पटक एकल बहुमतको सरकार पाउँदैछ । बहुमतको सरकार कुन दलको बन्छ त ? सायद यो भनिरहन नपर्ला । 
चुनाव प्रचारका क्रममा देशव्यापी रुपमा रास्वपाप्रति जुन लहर देखिएको थियो, त्यो लहर मतपत्रमा पनि अभिव्यक्त भएको पाइएको छ ।

मतदान गरेका कतिपय मतदाताले खुलेरै घण्टीमा मतदान गरेको बताइसकेका छन् । जसले भनेका छैनन्, तिनले पनि घण्टीमा मतदान गरेको संकेत गरेका छन् । 

विगतमा कांग्रेस-एमाले लगायत दलहरुले भनेका थिए, यो निर्वाचन प्रणालीबाट बहुमत ल्याउन असम्भव भयो, निर्वाचन प्रणाली नै परिवर्तन गर्नु पर्यो । 

के निर्वाचन प्रणालीका कारण मात्रै यसअघिका चुनावमा दलहरुले बहुमत नपाएका हुन् त ? होइन, उनीहरुको दाबी नै गलत थियो । 

अहिले रास्वपाले जनताको मुद्दा टिपेको छ । जनताको साथमा छौं भन्ने सन्देश रास्वपा नेताहरुले दिएका छन् । देशको भविष्यको जिम्मा हामी लिन्छौं भनेका छन् । जनतालाई भरोसा जगाएका छन् । त्यसैले त जनताले पनि रास्वपाप्रति भरोसा गरेका छन् र मतदान गरेका छन् । 

रास्वपाले बहुुमत ल्याउँदा प्रधानमन्त्री बन्नेछन्, बालेन शाह । रास्वपाले चुनावअघि नै बालेनलाई भावी प्रधानमन्त्री घोषणा गरिसकेको छ । 

अघिल्लो चुनावअघि बनेको पार्टी हो रास्वपा । पहिलो चुनावमै २१ सिट जित्यो । समग्रमा करिव साढे दश प्रतिशत पायो । अहिले त रास्वपाले ३ वर्ष पार गरिसकेको छ । यसबीचमा रास्वपाले सरकारमा हुँदा होस् वा सदनमा, जुन जुन मुद्दा उठायो, त्यसले जनताको मन छोयो । हो, जनताले त्यही मन अहिले मतपत्रमा अंकित गरिदिए ।

अन्तिम मत परिणाम सार्वजनिक हुन केही दिन लाग्ला । प्रत्यक्षतर्फको गणना त २४ घण्टाभित्र सकिन्छ भनेर निर्वाचन आयोगले भनिसकेको छ । समानुपातिकतर्फको भोट गन्न अर्को २४ घण्टा लाग्ला । अब बढीमा ३ दिनभित्र त करिव करिव सबै भोट गनेर सकिन्छ । निर्वाचन आयोगले भनेकै मान्ने हो भने पनि २५ गतेसम्म त आयोगले सम्पूर्ण रिपोर्ट सार्वजनिक गरिसक्छ । त्यसपछि के हुन्छ त ? 

हो, त्यसपछि हुने भनेको नयाँ सरकार गठन हो । बालेन शाहको नेतृत्वमा नयाँ सरकार बन्छ । नयाँ सरकारले देशको बागडोर सम्हाल्छ । अनि त्यो सरकारले जनताले चाहेअनुसारको काम गर्नेछ । 
एउटा कुरा भन्नै पर्ने हुन्छ, यो नियमित चुनाव होइन र मुलुकमा सहजै चुनाव भएको पनि होइन । 

यो चुनाव जेनजी आन्दोलनको परिणाम हो । जेनजी नजागेका भए, गएको भदौ २४ गते एमाले कांग्रेसको सत्ता ढल्ने थिएन । जेनजी जागे, ७७ जनाको त ज्यान नै गयो ।

तत्कालीन कांग्रेस-एमाले सरकारले जसरी नवयुवाका टाउको र छातीमा ताकी ताकी गोली ठोक्यो, त्यसको आक्रोश भदौ २४ मा पोखियो । भदौ २३ र २४ मा कसले के गर्यो, त्यसको छानबिन गौरीबहादुर कार्की नेतृत्वको जाँचबुुझ आयोगले गरिरहेको छ। सम्भवतः अब केही दिनभित्रै कार्की आयोगले प्रतिवेदन बुुझाउने छ । त्यसपछि त दूधको दूध, पानीको पानी छुट्टिने छ । 

जनताले आफ्नो मत अभिमत व्यक्त गरिसकेका छन् । त्यसलाई अस्वीकार गर्ने छुट कसैलाई छैन । स्वीकार गर्ने मात्रै होइन, अब त्यो मतलाई सम्मान गर्ने हो । जनताको चाहना पूरा गर्ने हो ।

भदौ २७ गते, जेनजीहरुकै प्रस्ताव र रोजाईमा पूर्वप्रधानन्यायाधीश सुशीला कार्कीले सत्ता सम्हाल्दै गर्दा मुलुकको अवस्था कस्तो थियो ? कल्पना गरौं त ?

उनै सुशीला कार्कीले देशलाई खरानीबाट उठाएर अहिले सहज अवतरण गराएकी छन् त्यो पनि शान्तिपूूर्ण चुनाव गराएर । नेपालमा अन्तरिम सरकार अनि नागरिक सरकार असफल भएको रेकर्ड छैन । २०४७ सालमा अन्तरिम सरकारले चुनाव गरायो । २०७० सालमा पनि अन्तरिम सरकारले नै चुनाव गरायो ।

अहिले पनि सुशीला कार्की नेतृत्वको अन्तरिम सरकारले नै चुनाव गरायो । शान्तिपूूर्ण रुपमा निर्वाचन गराएर मुलुकलाई सहज निकास दिन सफल भएकोमा प्रधानमन्त्री सुशीला कार्कीसहित सिंगो सरकार धन्यवाद र बधाईको पात्र बनेको छ ।

केही दिनभित्रै नागरिक सरकारले जनताबाट निर्वाचित राजनीतिक नेतृत्वलाई सत्ता हस्तान्तरण गर्ने छ । नयाँ सरकारले गर्नुपर्ने काम थुप्रै छ। अन्तरिम सरकारले आफ्नो जिम्मेवारीमा सफलतापूर्वक पुरा गर्यो। अब नयाँ सरकार पनि जनताको परीक्षामा सफल हुनुपर्छ, उत्तीर्ण हुनुपर्छ ।

हाम्रो शुुभकामना छ ।