उदयपुर–२ मा रास्वपा उम्मेदवार सुर्य लामा भारी मतान्तरले निर्वाचित

काठमाडौँ । उदयपुर –२  बाट प्रतिनिधिसभा सदस्यमा राष्ट्रिय स्वतन्त्र पार्टी (रास्वपा)का सुर्य लामा  निर्वाचित भएका छन् । निर्वाचन मत परिणाम अनुसार उनले निकटतम प्रतिद्वन्द्वी नेकपा एमालेका अम्बरबहादुर रायमाझीलाई  ७ हजार १ सय ५४ मतान्तरले पराजित गर्दै जीत हासिल गरेका हुन् ।

अन्तिम मत परिणाम अनुसार लामाले १४ हजार ८०२  मत प्राप्त गरेका छन् भने रायमाझीले ७  हजार ६४८ मत पाएका छन्। त्यसैगरी नेपाली कांग्रेसका राम कुमार राईले  ७ हजार २ सय १०, नेपाली कम्युनिस्ट पार्टीका सुरेशकुमार राईले  ५ हजार १९७ मत ल्याउँदा श्रम संस्कृति पार्टीका बलराज राइले ४ हजार १३९  मत  प्राप्त गरेका छन् ।

Watch On

पार्टीको जिल्ला सचिव समेत रहेका लामाले पुराना दलबाट विकास सम्भव नभएको भन्दै युवाहरु राजनीतिमा आउनु पर्छ भन्ने मान्यताले आफू राजनीतिमा आएको बताएका छन। लामा कटारी , ७ मर्जेतपुरका स्थानीय हुन् । ४१ वर्षिय लामा यस अघि पर्यटन विकास लागि कटारी ७ कै गढिकोटको पर्यटन विकासका अभियन्ता थिए ।

स्थानीय पर्यटकीय विकास गर्नुपर्छ भनेर काम गरिहेका लामा २०७९ साल असोजदेखि रास्वापामा कृयाशिल राजनीति गरिरहेका छन् । कक्षा १२ उत्तीर्ण लामा भ्रष्टाचार , वेथितिले सिमा नाघेपछी नयाँ पुस्ता राजनीतिमा आउने क्रममा आफु पनि सकृय भएको लामा बताउँछन् । युवाहरु  माझ सवैसँग घुलमिल हुने कम वोल्ने र मिजासिलो स्वाभावका लामा आफूलाई भुई मान्छेको प्रतिनिधित्व ठान्छन्।  

यस क्षेत्रमा गएको २०७९ को निर्वाचनमा रास्वपाबाट अनिल श्रेष्ठ उमेद्वार बनेका थिए ।  पार्टी पहिलो पटक चुनावी मैदानमा जाँदा यस क्षेत्रमा श्रेष्ठले ९ सय १० र समानुपातिक तर्फ पार्टीले ३ हजार ८ सय ६ मत ल्याएको थियो ।

यस अघिको ईतिहासमा कम्युनिष्ट पार्टीहरुले चुनाव जितेको यस क्षेत्रमा यो पटक राष्ट्रिय स्वतन्त्र पार्टीको पक्षमा चुनावको नतिजा आएको छ।  २०७४ र २०७९ को निर्वाचनमा कम्युनिस्ट प्रभाव देखिएको उदयपुर प्रतिनिधिसभा निर्वाचन क्षेत्र २ मा यसपटक एमालेका निवर्तमान सांसद अम्बरबहादुर रायमाझी पुनः उम्मेदवार बनेका थिए ।

उनका प्रतिस्पर्धीका रूपमा नेपाली कम्युनिस्ट पार्टी (नेकपा)बाट सुरेशकुमार राई ‘हिमाल’, नेपाली कांग्रेसबाट रामकुमार राई, राष्ट्रिय स्वतन्त्र पार्टीबाट सूर्य लामा , श्रम संस्कृति पार्टीबाट बलराज राई र स्वतन्त्र उम्मेदवार मेजरकुमार राईसहित १३ जना चुनावी मैदानमा सहभागी थिए ।

२०७९ को निर्वाचनमा ४२ हजार १६१ मत सदर हुँदा रायमाझीले १५ हजार २५१ मत ल्याएर जितेका थिए । तत्कालीन एकीकृत समाजवादीका उम्मेदवार जगन्नाथ खतिवडाले १२ हजार ८९३ मत पाएर पराजित भएका थिए । कांग्रेसबाट असन्तुष्ट रहेर स्वतन्त्र उम्मेदवार बनेका रामकुमार राईले १० हजार ३७९ मत ल्याउँदा खतिवडाको हार भएको थियो ।

यस क्षेत्रमा बहुदलपछि पनि कम्युनिष्ट र गणतन्त्रपछि ०७० सालमा भएको संविधानसभाको एक चुनावमा मात्र कांग्रेसका नारायण वहादुर कार्की  विजयी भएका थिए भने बाँकी सबै निर्वाचनमा कम्युनिस्ट पार्टी नै विजयी हुँदै आएको क्षेत्र हो ।  क्षेत्र नम्बर २ अन्तर्गत उदयपुरगढी गाउँपालिकामा २० हजार ८७९, रौतामाईमा १४ हजार ९९३, लिम्चुङबुङमा आठ हजार ६८९, कटारी नगरपालिकामा ४१ हजार ४०६ र ताप्ली गाउँपालिकामा १० हजार १५५ गरी कुल ९६ हजार १२२ मतदाता छन् ।  ५१ मतदान स्थलका १ सय १५ मतदान केन्द्र मार्फत मतदाताले यस क्षेत्रमा मतदान गरेका थिए।