सिन्धुलीमा एक महिलालाई पोलमा बाँधेर बेहोस हुनेगरी कुटपिट, श्रीमानसहित ७ जना पक्राउ

काठमाडाैँ : सिन्धुलीमा एक महिलालाई पोलमा बाँधेर ३ दिनसम्म मरणासन्न हुनेगरी कुटपिट गरिएको छ ।

जिल्लाको कमलामाई नगरपालिका–४ की शारदा थापामाथि लेनदेनको विषयमा विवाद हुँदा उनलाई स्थानीयले पोलमा बाँधेर बेहोस हुनेगरी कुटपिट गरेका हुन् । कुटपिटमा संलग्न भएको आरोपमा प्रहरीले उनका श्रीमानसहित ७ जनालाई पक्राउ गरेको छ । 

घटनामा संलग्न रहेको आरोपमा प्रहरीले उनका श्रीमान सन्तोष थापा, स्थानीय ईश्वरकुमार पोखरेल, मिलन देवकोटा, निकेश ढकाल, लक्ष्मी पोखरेल, विष्णु ढकाल र एकबहादुर खड्कालाई पक्राउ गरेको हो ।

उनीमाथि अभ्रद र अमानवीय व्यवहार भएको सूचनाका आधारमा जिल्ला प्रहरी कार्यालय, सिन्धुलीबाट प्रहरी पुग्दा उनलाई पोलमा बेहोस अवस्थामा भेटिएको हो । उनलाई प्रहरीले उद्धार गरी सिन्धुली अस्पताल पुर्‍याएपछि होस खुलेको थियो । उनलाई अहिले सेफ होममा राखेको छ । 

प्रहरीको प्रारम्भिक अनुसन्धानका क्रममा शारदाका श्रीमान सन्तोषले जग्गा कारोबारका लाागि स्थानीयसँग ऋण लिएको र उक्त पैसा तिर्न नसक्दा परिवारमा झगडा गरेपछि शारदा डिभोर्स गर्ने चरणमा पुगेकी थिइन् । जसका लागि परामर्शका लागि अदालत पुगेकी उनलाई स्थानीयले अपहरण गरेर घरमा ल्याएर श्रीमान श्रीमति दुवैलाई पोलमा बाँधेर कुटपिट गरेका थिए । 

सुरुमा श्रीमान श्रीमति दुवैलाई कुटपिट गरेपनि पछि भने श्रीमति एक्लैलाई कुटपिट गरेका थिए। यो घटनामा पक्राउ परेकामध्ये कोही स्थानीय स्तरमा राजनीतिमा संलग्न व्यक्तिसमेत रहेको प्रहरीले जनाएको छ । 

त्यस्तै प्रहरीले आफूहरु अनुुसन्धानका क्रममा रहेका कारण अनुसन्धान सकिएपछि जानकारी गराउने बताएको छ ।