बारा प्रिन्सिपल हत्या प्रकरण : फरार सुटरमाथि गोली प्रहार गरी प्रहरीले लियो नियन्त्रणमा

बाराको कलैया उपमहानगरपालिका–६ मदरसा टोलस्थित बाल एकता स्कुलका प्रिन्सिपल रूपेश स्वर्णकारको हत्याका मुख्य सुटर आरोपीलाई प्रहरीले गोली प्रहार गरी पक्राउ गरेको छ ।

Watch On

गत कार्तिक १३ गते प्रिन्सिपल स्वर्णाकारको गोली हानेर हत्या भएको थियो । घटनाको तीन दिन पश्चात प्रहरीले पाँच जनालाई पक्राउ गरी सार्वजनिक गरेको थियो तर प्रहरीको फरार सूचीमा मुख्य सुटर ३२ वर्षीय सुजित सिंह । उनलाई जिल्लाको विश्रामपुर गाउँपालिका ३ बाट गएराति ८ बजे गोली हानेर पक्राउ गरिएको बारा प्रहरीले जनाएको छ । 

प्रिन्सिपलको हत्या गरेर फरार बनेका उनीसहित ४ जनाको समूह पुनः नेपाल प्रवेश गरेको खबर पाएको प्रहरीले उनलाई फलो गरिरहेको थियो । प्रहरीलाई देखेर भाग्न खोजेपछि प्रहरीले उनको खुट्टामा गोली प्रहार गरी नियन्त्रणमा लिएको हो । 

उनको अहिले प्रादेशिक अस्पताल कलैयामा उपचार भइरहेको छ ।

प्रिन्सिपल स्वर्णाकारको हत्यामा आठ जनाको संलग्नता रहेको प्रहरीले बताउँदै आएको छ । उनको हत्या आरोपमा यसअघि नै प्रहरीले राधा गुप्ता, जाबेर अख्तर, चन्दन यादव, रियाज अन्सारी र अभिनव कुमार सिंहलाई पक्राउ गरिसकेको छ । 

प्रहरीको फरार सूचीमा सिंहसहित २४ वर्षीय चन्चल पाण्डे, २२ वर्षीय मनिषकुमार सहनी र २० वर्षीय कामेश्वर सहनी रहेका थिए । उनीहरुले मोटरसाइकलमा गएर प्रिन्सिपलमाथि गोली चलाएको सिसीटिभी फुटेजमा देखिएको थियो।