आफूलाई पक्राउ पुर्जी जारी गरेको विषयमा माेर्चामा साँझ छलफल हुने विप्लवकाे भनाई

अदालतबाट पक्राउ पुर्जी जारी भएर पनि बुधबार प्रधानमन्त्री निवासमै समाजवादी मोर्चाको बैठकमा भेला भएका नेपाल कम्युनिस्ट पार्टी (नेकपा) का महासचिव नेत्र विक्रम चन्द ‘विप्लव’ले आफूलाई पक्राउ पुर्जी जारी गरेको विषयमा साँझ छलफल हुने बताएका छन् ।

Watch On

बुधबार बिहान ९ बजेदेखि प्रधानमन्त्रीको सरकारी निवासमा बसेको मोर्चाको बैठकबाट बाहिरिने क्रममा उनले साँझ ६ बजे पुनः बस्ने र त्यसमा आफूलाई पक्राउ पुर्जी जारी गरेको विषयमा छलफल हुने बताएका हुन् । 

‘सरकारले सहमति पनि गर्ने घेराबन्दी पनि गर्ने चित्रहरू देखिएका छन्, यो विषयमा आजै साँझ ६ बजे बस्ने बैठकमा छलफल हुन्छ।’, उनले भने । 

बैठकमा प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष, माधव नेपाल, नेता घनश्याम भुसाल, नेकपाका महासचिव नेत्रविक्रम चन्द विप्लव, जसपाका अध्यक्ष उपेन्द्र यादव, माओवादी केन्द्रका महासचिव देव गुरुङ, उपमहासचिव गिरीराजमणि पोखरेल लगायतका नेता सहभागी थिए । 

बैठकमा सरकारको एक वर्षको समीक्षा, आगामी राष्ट्रिय सभा निर्वाचन र मोर्चाको गतिविधिका विषयमा छलफल भइरहेको बताइएको थियो । 

२०८० असार ४ गते गठन भएको समाजवादी मोर्चामा माओवादी केन्द्र, जनता समाजवादी पार्टी (जसपा), नेकपा एकीकृत समाजवादी र सत्ताबाहिर रहेको विप्लव नेतृत्वको नेकपा कम्युनिष्ट पार्टी संलग्न छन्।