टेरामक्स प्रविधिमा कानुनको उल्लंघन ठहर, अनुसन्धान गर्न अख्तियारलाई निर्देशन

प्रतिनिधिसभा अन्तर्गतको सार्वजनिक लेखा समितिले टेरामक्स प्रविधि खरिद प्रक्रियामा कानुनको उल्लंघन भएको ठहर गरेको छ ।

Watch On

बुधबार बसेको समितिको बैठकले टेलिकम्यूनिकेसन ट्राफिक मनिटरिङ एण्ड फ्रड कन्ट्रोल सिस्टम (टेरामक्स) प्रविधि खरिद प्रक्रियामा कानुनको उल्लंघन भएको ठहर गर्दै नेपाल दूरसञ्चार प्राधिकरणलाई टेरामक्स खरिद प्रक्रियासँगै कार्यान्वयन र जडान प्रक्रिया समेत रोक्न निर्देशन दिएको हो ।

समितिमा लामो छलफल र अनुसन्धानपछि समितिका सभापति ऋषिकेश पोखरेलले बुधबार बैठकको निर्णय सुनाउँदै विवादित विषयमा सुक्ष्म अनुसन्धान नगरेसम्म टेरामक्ससम्बन्धी सम्पूर्ण प्रक्रिया यथास्थितीमा राख्न निर्देशन दिएका हुन् ।

‘टेरामक्स खरिद प्रक्रियाको सबै काम हाललाई यथास्थितिमा राख्दै हालसम्म सम्पादित कार्यहरुको सुक्ष्म विश्लेषण तथा अनुसन्धान गर्दा यो प्रक्रियामा सैद्धान्तिक, नीतिगत र सर्वोच्च अदालतको परमादेश समेत उल्लंघन भएको समितिको ठहर छ ।,’ उनले भने । 

त्यस्तै समितिले यसबारे शीघ्र अनुसन्धान गरी निष्कर्षमा पुर्‍याउन र दोषी देखिएकाविरुद्ध कानूनबमोजिम कारबाही गर्न अख्तियारलाई निर्देशन समेत दिएको छ ।