युद्धका कारण उडान अवरुद्ध हुँदा ३८ जना नेपालीको शव ल्याउन समस्या

काठमाडौँ । परराष्ट्र मन्त्रालयले पश्चिम एसियामा युद्धका कारण उडान अवरुद्ध हुँदा ३८ जनाको शव स्वेदश ल्याउन समस्या भएको जनाएको छ ।

शुक्रबार परराष्ट्र मन्त्रालयमा आयोजित पत्रकार सम्मेलनमा मन्त्रालयका प्रवक्ता लोकबहादुर क्षेत्रीले उडान अवरुद्ध भएका कारण बिभिन्न कारणले मृत्यु भएका करिव ३८ जना नेपालीको शव फिर्ता समस्या भएकोप्रति गम्भीर रहेको बताए । 

Watch On

उनले चैत्र १८ गते कुवेत एयरलाइन्सबाट ९ वटा शव ल्याइसकिएको र अरु शवहरु पनि ल्याउने कार्य अघि बढिसकेको जानकारी दिए । प्रवक्ता क्षेत्रीले पश्चिम एसियामा युद्ध सुरुभएयता करिव साढे ८६ हजार नेपालीले उद्धारको लागि नाम टिपाएकोमा हाल असुरक्षित रहेको छु भन्ने नेपालीहरुको संख्या क्रमश घट्दै गएको उल्लेख गरे । 

त्यसैगरि युद्धको समयमा अफवाह फैलाउने सामाग्री सामाजिक सञ्जालमा नराख्न गरिएको निर्देशन नेपालीहरुले पालना गरिरहेको भन्दै उहाले नियम उलंघन गर्ने केहि नेपालीहरु पक्राउ परेको जानकारी दिए । यस्ता घटनामा हालसम्म एघार जना नेपालीहरू पक्राउ परेको खवर प्राप्त भएको उनले बताए । उनले इरानमा रहेका ११ जना नेपालीहरु सुरक्षित अवस्थामा रहेको र दोहास्थीत नियोग सम्पर्कमा रहेको जानकारी दिए । 

प्रवक्ता क्षेत्रीले ठूलो समस्यामा परेर नेपाल फर्कन चाहने नेपालीहरुलाई सम्बन्धीत दुतावासमा सम्पर्क गर्न भनेको र आवश्यक सहजीकरण गर्ने काम अघि बढाइएको बताए । पश्चिम एसियाको युद्धका कारण ठूलो संख्यामा रोजगारी गुम्न सक्ने अवस्था नदेखिएको उनको भनाइ छ ।