प्रेमीसँग भाग्न तयार भएकी श्रीमतिलाई श्रीमानले लखेटेर गरे हत्या

प्रेमीसँग भाग्न तयार भएकी श्रीमतिलाई श्रीमानले लखेटेर हत्या गरेका छन् ।

Watch On

श्रीमति रेखा घर्तीको हत्या गरेको आरोपमा प्रहरीले बिहिबार पोखरा महानगरपालिका–२९ नौबिसे बस्ने एक पुरूषलाई पक्राउ गरेको हो । पक्राउ पर्नेमा म्याग्दी धौलागिरी गाउँपालिका–७ का ३६ वर्षीय रत्नबहादुर घर्ती रहेका छन् ।

जिल्ला प्रहरी कास्कीका अनुसार रेखा रत्नबहादुरकी कान्छी श्रीमती हुन् । २ जना बच्चासमेत भएका उनीहरुबिच केही समययता सम्बन्ध बिग्रिएको थियो । सम्बन्ध बिग्रिँदै गएपछि रेखाको अर्को पुरुषसँग प्रेम भएको र उनी सोही पुरुषसँग बिहिबार भाग्ने तयारीमा थिइन् । 

उनीहरुको भाग्ने तयारीको सुइँको पाएपछि रत्नबहादुरले उनीहरु दुवैजनालाई लखेटेका थिए । लखेट्ने क्रममा रत्नबहादुरले श्रीमतिलाई तोरीबारीमा भेटेको र आफूले लगाएको जुत्ताको तुना निकालेर घाँटीमा कसेर हत्या गरेका हुन् । 

उनले हत्या गरेको देख्ने प्रत्यक्षदर्शीले प्रहरीलाई सम्पर्क गरेका थिए । खबर पाउनासाथ इलाका प्रहरी कार्यालय शिशुवाबाट खटिएको प्रहरी टोलीले उनलाई घटनास्थल नजिकैबाट नियन्त्रणमा लिएको थियो । त्यस्तै उनमाथि थप अनुसन्धान अघि बढाएको प्रहरीले जनाएको छ।