हिमाल, संस्कृति र साहसिक पर्यटनको गन्तव्यः मुस्ताङ

मुस्ताङ । हिमाली जिल्ला मुस्ताङ पछिल्लो समय नेपालकै प्रमुख पर्यटकीय गन्तव्यका रूपमा परिचित बन्दै गएको छ। प्राकृतिक सौन्दर्य, हिमाली भू–दृश्य, प्राचीन संस्कृति तथा धार्मिक सम्पदाले भरिपूर्ण मुस्ताङले आन्तरिक तथा बाह्य पर्यटकलाई समान रूपमा आकर्षित गरिरहेको छ।

समुद्री सतहबाट उच्च भूभागमा रहेको मुस्ताङलाई नेपालको हिमाली मरुभूमि पनि भनिन्छ। यहाँको प्रसिद्ध मुक्तिनाथ मन्दिर हिन्दु तथा बौद्ध धर्मावलम्बीहरूको साझा तीर्थस्थल हो। हरेक वर्ष हजारौँ भक्तजन मुक्तिनाथ दर्शनका लागि पुग्ने गरेका छन्। त्यस्तै, लोमान्थाङ दरबार, प्राचीन गुम्बा, ढुंगाले बनेका गाउँ तथा कालीगण्डकी नदी किनारका दृश्य पर्यटकका मुख्य आकर्षण बनेका छन्।

Watch On

सडक सञ्जाल विस्तार र हवाई पहुँच सहज बन्दै गएपछि मुस्ताङमा पर्यटक आगमन उल्लेख्य रूपमा बढेको व्यवसायीहरू बताउँछन्। विशेषगरी पोखराबाट सडकमार्ग हुँदै जाने आन्तरिक पर्यटकको संख्या पछिल्ला वर्षमा तीव्र रूपमा वृद्धि भएको छ। चिसो मौसममा हिमाल अवलोकन, मोटरसाइकल तथा जिप यात्रा, पदयात्रा र धार्मिक भ्रमणका लागि पर्यटक मुस्ताङ पुग्ने गरेका छन्।

विदेशी पर्यटकहरू पनि मुस्ताङको अनौठो भूगोल, तिब्बती संस्कृतिसँग मिल्दोजुल्दो जीवनशैली र साहसिक पर्यटनका कारण आकर्षित हुने गरेका छन्। होटल व्यवसायीका अनुसार युरोप, अमेरिका, चीन तथा दक्षिण एसियाली मुलुकबाट आउने पर्यटकको संख्या क्रमशः बढ्दै गएको छ।

पर्यटन व्यवसायीहरूले मुस्ताङलाई अन्तर्राष्ट्रिय स्तरमा थप प्रवर्द्धन गर्न पूर्वाधार, सरसफाइ, सुरक्षित यात्रा र पर्यटकमैत्री सेवा विस्तार क आवश्यक रहेको बताएका छन्। प्राकृतिक र सांस्कृतिक सम्पदाले भरिएको मुस्ताङ नेपालको पर्यटन क्षेत्रको महत्वपूर्ण आधारका रूपमा स्थापित हुँदै गएको छ।

तस्बिरः सुर्याम्स उप्रेती, नेपाल फोटो लाइब्रेरी